സൈബര്‍ ഗറില്ലാജീവിതവും ഒളിപ്പോരെന്ന ചലച്ചിത്രവും

അജയ് ശേഖര്‍

ജീവിക്കാനായി കേരള മണ്ണില്‍ നിന്നും ബാങ്കളൂരുവിലേക്കു ചേക്കേറുന്ന സൈബര്‍ പോരാളികള്‍ ഒരു നിര്‍ണായക കലാപ്രകടനത്തിന്റെ പരിശീലനത്തിലാണ്. പാട്ടും ആട്ടവും കവിതയും പ്രകടനവും പോരാട്ടവും കലരുന്ന പ്രവാസി യുവാക്കളുടെ കലാപ്രകടനത്തിന്റെ അന്ത്യപരിശീലനരംഗത്തേക്കു കുതിക്കുന്ന ഒളിപ്പോരാളിയായ അജയന്‍ അവിടെയെത്തുന്നില്ല. റോഡപകടത്തില്‍ പെട്ട് ഒരാശുപത്രിക്കിടക്കയില്‍ അവസാനശ്വാസം വലിക്കുകയാണീ വിമതനായ കഥാനായകന്‍. കൂട്ടുകാരുടേയും സഹജീവികളുടേയും ഓര്‍മയിലൂടെയും വാചികാഖ്യാനങ്ങളിലൂടെയും അയാളുടെ ജീവിതമാകെ ഭുതവും വര്‍ത്തമാനവും വേറല്ലാതെ ഇതള്‍ വിരിയുകയാണ്. അജയന്‍ തന്നെ ഉയര്‍ത്തെഴുന്നേറ്റ് വന്ന് പ്രേക്ഷകര്‍ക്കു മുന്നില്‍ ഒരു പ്രമുഖ ആഖ്യാനപാത്രമാവുകയും ചെയ്യുന്നു. പരേതന്‍ സ്വന്തം ജീവിത മൂഹൂര്‍ത്തങ്ങളിലൂടെ നടത്തുന്ന യാത്രയും ആഖ്യാനവും നിരീക്ഷണവുമായി സിനിമ ദൃശ്യകൗതുകത്തോടെ വികസിക്കുകയാണ്.

• കറുത്തകാലത്തു പാട്ടുകളുണ്ടോ…
  തീര്‍ച്ചയായും, കറുത്ത കാലത്തേ കുറിച്ചുള്ള പാട്ടുകള്‍ .
  (ബ്രെഹ്ത്)

അജയന്‍ എന്ന ബ്ലോഗെഴുത്തുകാരന്റെ ജീവിതവും മരണവും പ്രശ്‌നവല്‍ക്കരിക്കുന്ന പുതിയ മലയാള ചിത്രമാണ് എ. വി. ശശിധരന്‍ സംവിധാനം ചെയ്ത ഒളിപ്പോര്. 2013 ആഗസ്ത് 23ന് പ്രദര്‍ശനത്തിനെത്തിയ ചിത്രം സമ്മിശ്ര പ്രതികരണങ്ങളുയര്‍ത്തിയ ഒരസാധാരണ സിനിമയാണെന്നു പ്രേക്ഷകര്‍ പൊതുവേ വിലയിരുത്തുന്നു. ഫഹദ് നായകനാകുന്ന ചിത്രത്തിന്റെ കഥയും തിരക്കഥയും കവി പി. എന്‍ . ഗോപീകൃഷ്ണനാണ് നിര്‍വഹിച്ചിട്ടുള്ളത്. പ്രമേയ തലത്തിലും പ്രതിനിധാന തലത്തിലും പരീക്ഷണങ്ങളും വിഛേദങ്ങളും ഉള്‍ക്കൊള്ളുന്ന ഒരു പ്രതിസിനിമയാണ് ഒളിപ്പോര്. സാമ്പ്രദായിക കഥാഖ്യാന ചിത്രങ്ങളേയും ജനപ്രിയമായ ഗ്ലാമര്‍-സംഘട്ടന-ഗാന ചിത്രങ്ങളേയും പലരീതിയില്‍ വിമര്‍ശിക്കുകയും പരിഹസിക്കുകയും അപനിര്‍മിക്കുകയും ചെയ്യുന്ന അന്യവല്‍ക്കരണ സ്വഭാവവും ഭിന്നാഖ്യാന ക്ഷമതയും സാമൂഹ്യ രാഷ്ട്രീയ വിമര്‍ശവുമടങ്ങുന്ന ഒരു ബ്രെഹ്തിയന്‍ -ഗോദാര്‍ദിയന്‍ സിനിമയായി ചിത്രത്തെ കാണാവുന്നതാണ്. കലാപ്രവര്‍ത്തകരും സൈബര്‍ ആക്റ്റിവിസ്റ്റുകളുമായ നിരവധി യുവതീയുവാക്കന്മാരുടെ നോക്കുപാടുകളിലൂടെ നായകനായ അജയന്റെ ജീവിതവും ഗറില്ലാ പോരാട്ടങ്ങളും ഭാഗീകമായും ഭിന്നമായും മിശ്രമായും മറനീക്കുന്നതില്‍ ചിത്രം അസാധാരണമായ കലാകൗശലവും കലാപക്ഷമതയും കാട്ടുന്നു.
ഒളിപ്പോരാളി എന്നത് അജയനെന്ന ബ്ലോഗറുടെ തൂലികാനാമമാണ്. സൈബര്‍ സംസ്‌കാര രാഷ്ട്രീയത്തിന്റെ വിധ്വംസകമായ ഗറില്ലാ സ്വഭാവത്തേയും വിവരവിജ്ഞാനീയപരമായ പ്രഹരശേഷിയേയും സൂചിപ്പിക്കുന്നതോടൊപ്പം ശബ്ദവും മുഖവും മനുഷ്യാര്‍ജവവും ജൈവീകസന്നിഹിതത്വവും പ്രതിനിധാന നൈതികതയും നഷ്ടമാകുന്ന വിര്‍ച്വല്‍ റിയാലിറ്റിയുടെ, പ്രതീതി യാഥാര്‍ഥ്യത്തിന്റെ പ്രശ്‌നലോകത്തെ കൂടി ചിത്രം വിമര്‍ശാത്മകമായി കാഴ്ച്ചപ്പെടുത്തുന്നു. ഉത്തര മുതലാളിത്തത്തിന്റേയും ഹൈട്ടെക്ക് ഹിന്ദുത്വത്തിന്റേയും സൈബര്‍ മോഡിത്തത്തിന്റേയും കാലത്തെ (നമോയെന്നെ മൊബൈല്‍ തന്നെ കമ്പോളത്തിലിറങ്ങുന്നത്രേ) ജീവിതത്തേയും പ്രതിരോധത്തേയും കലയേയും സൂക്ഷ്മമായി അന്യാപദേശം ചെയ്യുകയും കൂടിയാണ് ചിത്രം. പക്ഷേ സംവേദനതലത്തില്‍ ജനപ്രിയതയുടെ രസതന്ത്രത്തെ ചിത്രം തികച്ചും വിട്ടുകളയുകയും സാമ്പത്തികമായി സ്വയം റദ്ദാകുകയും ചെയ്തു. നിര്‍ഭാഗ്യകരം എന്നു പറയാം തീയേറ്ററുകളില്‍ സാധാരണ പ്രേക്ഷകര്‍ ചിത്രത്തെ കൈയ്യൊഴിയുകയും പ്രദര്‍ശനക്കാര്‍ പടം വേഗത്തില്‍ മാറ്റുന്നതിനു തിടുക്കം കൂട്ടുകയും ചെയ്യുന്നു.
ജീവിക്കാനായി കേരള മണ്ണില്‍ നിന്നും ബാങ്കളൂരുവിലേക്കു ചേക്കേറുന്ന സൈബര്‍ പോരാളികള്‍ ഒരു നിര്‍ണായക കലാപ്രകടനത്തിന്റെ പരിശീലനത്തിലാണ്. പാട്ടും ആട്ടവും കവിതയും പ്രകടനവും പോരാട്ടവും കലരുന്ന പ്രവാസി യുവാക്കളുടെ കലാപ്രകടനത്തിന്റെ അന്ത്യപരിശീലനരംഗത്തേക്കു കുതിക്കുന്ന ഒളിപ്പോരാളിയായ അജയന്‍ അവിടെയെത്തുന്നില്ല. റോഡപകടത്തില്‍ പെട്ട് ഒരാശുപത്രിക്കിടക്കയില്‍ അവസാനശ്വാസം വലിക്കുകയാണീ വിമതനായ കഥാനായകന്‍. കൂട്ടുകാരുടേയും സഹജീവികളുടേയും ഓര്‍മയിലൂടെയും വാചികാഖ്യാനങ്ങളിലൂടെയും അയാളുടെ ജീവിതമാകെ ഭുതവും വര്‍ത്തമാനവും വേറല്ലാതെ ഇതള്‍ വിരിയുകയാണ്. അജയന്‍ തന്നെ ഉയര്‍ത്തെഴുന്നേറ്റ് വന്ന് പ്രേക്ഷകര്‍ക്കു മുന്നില്‍ ഒരു പ്രമുഖ ആഖ്യാനപാത്രമാവുകയും ചെയ്യുന്നു. പരേതന്‍ സ്വന്തം ജീവിത മൂഹൂര്‍ത്തങ്ങളിലൂടെ നടത്തുന്ന യാത്രയും ആഖ്യാനവും നിരീക്ഷണവുമായി സിനിമ ദൃശ്യകൗതുകത്തോടെ വികസിക്കുകയാണ്.
വിവര സാങ്കേതിക വിപ്ലവകാലത്തെ നവ ഉദാരതയുടേയും നവബ്രാഹ്മണ്യത്തിന്റേയും പരിസരത്തുള്ള സങ്കീര്‍ണമായ അതിജീവനയിടങ്ങളെ കുറിച്ചുള്ള ഈ വിചിത്രമായ ശകലിത ശബ്ദദൃശ്യാഖ്യാനത്തിലൂടെ കേരളത്തിന്റെ സമകാലിക ജീവിത യാഥാര്‍ഥ്യങ്ങളേയും കേരള ആധുനികതയുടെ ഭുതത്തേയും വര്‍ത്തമാനത്തേയും ഭാവിയേയും കുറിച്ചുള്ള ഗൗരവമേറിയ ചലച്ചിത്രവിചാരവും കൂടിയായി ചിത്രം മാറുകയാണ്.

_____________________________________

എന്നാല്‍ ആദ്യ പകുതിയിലെ പൊതുബോധത്തില്‍ തികച്ചും വിരസവും ദീര്‍ഘവുമായ രംഗങ്ങളും ദൃശ്യങ്ങളും സാധാരണ ജനപ്രിയസംവേദനശീലമുള്ള പ്രേക്ഷകരെ ഇടവേളയില്‍ തന്നെ കൊട്ടക വിടാന്‍ പ്രേരിപ്പിക്കുന്നു. പലയിടങ്ങളിലും ഒന്നോ രണ്ടോ ദിനം മാത്രമാണ് ചിത്രം ഓടിയതെന്ന കാര്യം നവാഗതരായ ശശിയും ഗോപിയും പ്രത്യേകം പഠിക്കേണ്ടിയിരിക്കുന്നു. ജനപ്രിയതയുടെ പല ചേരുവകളുണ്ടായിരുന്നിട്ടും പ്രേക്ഷകരുടെ, അതായത് പണം കൊടുത്ത് കൊട്ടകയിലെത്തി സിനിമയെ സാധ്യമാക്കുന്ന ബഹുജനങ്ങളുടെ അധ്വാനത്തേയും സമയത്തേയും ക്ഷമയേയും പരീക്ഷിക്കുന്ന ബൗദ്ധിക പ്രയോഗങ്ങള്‍ പുതിയ ചലച്ചിത്രപ്രവര്‍ത്തകര്‍ കരുതലോടെ വേണം ഇടകലര്‍ത്താന്‍. വന്നെത്തുന്ന പ്രേക്ഷകരെ കൊട്ടകയിലിരുത്തിയാലേ ബഹുജനോന്മുഖവും ബഹുജന ഹിതത്തിലേക്കുള്ളതുമായ ചലച്ചിത്രം സാധ്യമാവൂ എന്ന പ്രാഥമിക തത്വം നവതലമുറക്കാര്‍ തന്നെ സമര്‍ഥമായി പ്രയോഗിക്കുന്ന പുതിയ പാതയും തന്ത്രവുമാണ്.

_____________________________________

എന്നാല്‍ ആദ്യ പകുതിയിലെ പൊതുബോധത്തില്‍ തികച്ചും വിരസവും ദീര്‍ഘവുമായ രംഗങ്ങളും ദൃശ്യങ്ങളും സാധാരണ ജനപ്രിയസംവേദനശീലമുള്ള പ്രേക്ഷകരെ ഇടവേളയില്‍ തന്നെ കൊട്ടക വിടാന്‍ പ്രേരിപ്പിക്കുന്നു. പലയിടങ്ങളിലും ഒന്നോ രണ്ടോ ദിനം മാത്രമാണ് ചിത്രം ഓടിയതെന്ന കാര്യം നവാഗതരായ ശശിയും ഗോപിയും പ്രത്യേകം പഠിക്കേണ്ടിയിരിക്കുന്നു. ജനപ്രിയതയുടെ പല ചേരുവകളുണ്ടായിരുന്നിട്ടും പ്രേക്ഷകരുടെ, അതായത് പണം കൊടുത്ത് കൊട്ടകയിലെത്തി സിനിമയെ സാധ്യമാക്കുന്ന ബഹുജനങ്ങളുടെ അധ്വാനത്തേയും സമയത്തേയും ക്ഷമയേയും പരീക്ഷിക്കുന്ന ബൗദ്ധിക പ്രയോഗങ്ങള്‍ പുതിയ ചലച്ചിത്രപ്രവര്‍ത്തകര്‍ കരുതലോടെ വേണം ഇടകലര്‍ത്താന്‍. വന്നെത്തുന്ന പ്രേക്ഷകരെ കൊട്ടകയിലിരുത്തിയാലേ ബഹുജനോന്മുഖവും ബഹുജന ഹിതത്തിലേക്കുള്ളതുമായ ചലച്ചിത്രം സാധ്യമാവൂ എന്ന പ്രാഥമിക തത്വം നവതലമുറക്കാര്‍ തന്നെ സമര്‍ഥമായി പ്രയോഗിക്കുന്ന പുതിയ പാതയും തന്ത്രവുമാണ്. പുതിയ നായിക സുഭിക്ഷ, സംത്രാസമുണര്‍ത്തുന്ന പുതിയ സംഗീത സംവിധായകനായ വര്‍ക്കിയുടെ ഉജ്വലമായ മലയാളം-റോക്ക് ഗാനങ്ങള്‍ , സ്ത്രീപുരുഷ ബന്ധങ്ങളുടെ ദൃശ്യത, മുണ്ടയാട്ടിന്റെ ഛായാഗ്രഹണിയുടെ ചേതോഹരമായ നോക്കുകോണുകളും നിലകളും ചലനങ്ങളും അര്‍ഥദീപ്തമായ വെളിച്ചവിന്യാസവും എല്ലാം ഉണ്ടായിട്ടും പ്രദര്‍ശന വിജയം നേടാനാവാത്ത വിധം ചിത്രം അപ്രത്യക്ഷമാകുന്നത് ശ്രദ്ധിക്കേണ്ടതുണ്ട്. സംഭാഷണത്തിലെ ഐറണിയും സര്‍ക്കാസവും ബുദ്ധിപരതയും സാധാരണക്കാരെ എളുപ്പത്തില്‍ ഓടിച്ചുകളയുന്നതായി പലരും അഭിപ്രായപ്പെടുന്നു. അതേ സമയം സാഹിത്യ സംവേദനീയതയുള്ള പ്രേക്ഷകരെ ഇതു പിടിച്ചിരുത്തുകയും ചെയ്യുന്നു.
ബാങ്കളൂരുവില്‍ പ്രവാസി മലയാളത്തിന്റെ ആധുനികോത്തരമായ പാട്ടുകളും കലാപ്രകടനങ്ങളും നടമാടവേ, കേരളാധുനികതയിലേക്കും മുന്‍തലമുറകളുടെ ചരിത്രാനുഭവത്തിലേക്കും ആഖ്യാന ശകലങ്ങള്‍ കടന്നു ചെല്ലുന്നു. കേരളത്തിന്റെ ഗ്രാമങ്ങളെ ഉണര്‍ത്തിയ നാടക സംസ്‌കാരവും നവോത്ഥാന സാംസ്‌കാരിക വിപ്ലവങ്ങളും തമ്മിലുള്ള ബന്ധം വളരെ ഗാഢമായി തന്നെ ചിത്രം ആലേഖനം ചെയ്യുന്നു. മാത്രമല്ല മണ്ണില്‍ നിന്നും ഉയര്‍ന്നു വരുന്ന കുമാരന്‍ എന്ന കഥാപാത്രത്തിലൂടെ നവോത്ഥാനത്തിന്റെ ഇടര്‍ച്ചകളേയും പുറന്തള്ളലിനേയും കുറിച്ചുള്ള ആധുനികാനന്തര വിമര്‍ശവും കൂടി ചിത്രം ഉള്‍ക്കൊള്ളുന്നു. കലാഭവന്‍ മണി എന്ന കേരളത്തിലെയെന്നല്ല ഇന്ത്യയിലെ തന്നെ ആദ്യ ദലിത നായകനടനായി ഉയര്‍ന്നു വന്ന അതുല്യ കലാകാരനാണ് കേരള മണ്ണിന്റെ മകനായ കുമാരനെ അവതരിപ്പിക്കുന്നത്. പുതുതലമുറ സിനിമകളില്‍ സ്വഭാവ നടനായും സഹനടനായും കാമിയോ റോളിലുമെല്ലാം ഒതുക്കപ്പെട്ട മണിയുടെ ശക്തവും ദീപ്തവുമായ വീണ്ടെടുപ്പാണ് ഒളിപ്പോരിനെ ശ്രദ്ധേയമാക്കുന്ന സുപ്രധാന വിമോചന ഘടകം. ഫഹദിനെ പോലെ മണിയും ഇവിടെ ഇരട്ട വേഷത്തിലാണ്. മരണപൂര്‍വവും മരണാനന്തരവുമായി കുമാരന്റെ ജീവിതം വെട്ടിമാറ്റപ്പെട്ടിരിക്കുന്നു.

_________________________________
2012 ഏപ്രിലിലില്‍ ദാരുണമായി അന്തരിച്ച ചേര്‍ത്തലയിലെ അഡ്വക്കേറ്റ് കെ. വി. ഷൈന്‍ എന്ന യുവ ബ്ലോഗറുടെ ജീവിതവും അന്ത്യവും ഒളിപ്പോരിലെ അജയന്റെ ജീവിതകഥയില്‍ നമുക്കു കാണുവാനാവും. മലയാള കുലീനതയേയും അതിന്റെ വീരവരേണ്യാപദാനങ്ങളേയും ശക്തമായി ചെറുക്കുന്ന വിധ്വംസകമായ ബ്ലോഗെഴുത്തിലൂടെ ശ്രദ്ധേയനായ ഈ ചെറുപ്പക്കാരനെ ഒരു സവര്‍ണ സ്വയം സേവക സമൂഹവും അതിന്റെ പിതൃസ്വരൂപമായ പരമാധ്യക്ഷനും കൂടി ദുരധികാരസ്വാധീനത്താല്‍ കെട്ടിച്ചമച്ച സൈബര്‍ക്കേസുകളില്‍ കുടുക്കി തിരുവനന്തപുരം പോലീസിന്റെ നിരന്തര പീഡനത്തിനിരയാക്കി ശ്വാസം മുട്ടിച്ചു. ജനായത്ത കാലത്തും അവശിഷ്ടമായ സവര്‍ണാധീശത്തത്തെ സൈബറെഴുത്തിലൂടെ വെല്ലുവിളിച്ച ആ ധീരകേരളപുത്രന്റെ സര്‍ക്കാര്‍ ജോലി തന്നെ ഈ കേസിന്റെ പേരില്‍ തമ്പുരാക്കള്‍ ഇല്ലാതാക്കി. കേരളത്തിലെ ആദ്യ സൈബര്‍ രക്തസാക്ഷിയാകാം കെ. വി. ഷൈന്‍ എന്ന ഒളിയെഴുത്തു പോരാളി. 

_________________________________

മരണശേഷവും മലയാളം പറയുന്നതഭിമാനമല്ലേ എന്ന ആ പരേതനായ പണിക്കാരന്റെ ചോദ്യം ശ്രേഷ്ഠഭാഷാവാദത്തോടും സംസ്‌കാര ദേശീയവാദങ്ങളോടും ഭാഷാമൗലികവാദത്തോടുമുള്ള അടിത്തട്ടിലെ ജനതയില്‍ നിന്നുള്ള നിശിതമായ പ്രതികരണവും തീവ്രവിമര്‍ശവുമാകുന്നു. തൃശ്ശൂരെ ചലച്ചിത്ര – സാഹിത്യ സംസ്‌കാരത്തിന്റെ ജനകീയ മുഖങ്ങളും സഹപാഠികളുമായ അധ്യാപകബുദ്ധന്മാര്‍ കെ. കെ. ഹിരണ്യനും ഐ. ഷണ്‍മുഖദാസും ചിത്രത്തില്‍ സ്വന്തം മുഖവും ഭാഷണവുമായി കടന്നു വരുന്നതും ശ്രദ്ധേയമായിരിക്കുന്നു.
യഥാര്‍ഥത്തില്‍ 2012 ഏപ്രിലിലില്‍ ദാരുണമായി അന്തരിച്ച ചേര്‍ത്തലയിലെ അഡ്വക്കേറ്റ് കെ. വി. ഷൈന്‍ എന്ന യുവ ബ്ലോഗറുടെ ജീവിതവും അന്ത്യവും ഒളിപ്പോരിലെ അജയന്റെ ജീവിതകഥയില്‍ നമുക്കു കാണുവാനാവും. മലയാള കുലീനതയേയും അതിന്റെ വീരവരേണ്യാപദാനങ്ങളേയും ശക്തമായി ചെറുക്കുന്ന വിധ്വംസകമായ ബ്ലോഗെഴുത്തിലൂടെ ശ്രദ്ധേയനായ ഈ ചെറുപ്പക്കാരനെ ഒരു സവര്‍ണ സ്വയം സേവക സമൂഹവും അതിന്റെ പിതൃസ്വരൂപമായ പരമാധ്യക്ഷനും കൂടി ദുരധികാര സ്വാധീനത്താല്‍ കെട്ടിച്ചമച്ച സൈബര്‍ക്കേസുകളില്‍ കുടുക്കി തിരുവനന്തപുരം പോലീസിന്റെ നിരന്തര പീഡനത്തിനിരയാക്കി ശ്വാസം മുട്ടിച്ചു. ജനായത്ത കാലത്തും അവശിഷ്ടമായ സവര്‍ണാധീശത്തത്തെ സൈബറെഴുത്തിലൂടെ വെല്ലുവിളിച്ച ആ ധീരകേരളപുത്രന്റെ സര്‍ക്കാര്‍ ജോലി തന്നെ ഈ കേസിന്റെ പേരില്‍ തമ്പുരാക്കള്‍ ഇല്ലാതാക്കി. കേരളത്തിലെ ആദ്യ സൈബര്‍ രക്തസാക്ഷിയാകാം കെ. വി. ഷൈന്‍ എന്ന ഒളിയെഴുത്തു പോരാളി. ജാതിഹിന്ദു സവര്‍ണയോടുള്ള വിമര്‍ശത്തെ വരമൊഴിയില്‍ ഹിന്ദു സാമാന്യബോധം പേറുന്ന മാധ്യമവേലക്കാര്‍ കുല്‍സിതമായി വെട്ടിനീക്കുന്നതു കൊണ്ടാണ് സൈബറിടങ്ങളുടെ ആശയപ്രകാശന സാധ്യതയെ അധീശവിമര്‍ശകരായ യുവ എഴുത്തുകാര്‍ ഉപയോഗിക്കുന്നതു തന്നെ. അവിടേയും അവരെ ഭരണകൂട മര്‍ദ്ദനയുക്തികളും സാംസ്‌കാരിക പൊലീസിങ്ങും കാട്ടി ഹിംസിക്കുകയാണ് കേരളത്തിലെ സവര്‍ണ ഹിന്ദു സാമാന്യബോധം. ഇന്ന് സങ്കുചിത രാജ്യസ്‌നേഹത്തെ തൃണവല്‍ഗണിച്ച് ലോകത്തെ ബഹുജനങ്ങളുടെ ഭാവികള്‍ക്കായി മുന്നറിയിപ്പിന്റെ വിസിലൂതുന്ന അസാഞ്ചേയും മാനിങ്ങും സ്‌നോഡനുമെല്ലാം അമേരിക്കന്‍ മൃദുസമഗ്രാധിപത്യ ഭരണകൂടത്തിന്റെ ഒളിഞ്ഞുനോട്ട സര്‍വെയിലന്‍സ് ഭീകരതയുടെ ഇരകളാവുമ്പോള്‍ നാം എന്നത്തേക്കാളും ഉപരി സവര്‍ണ ഹിന്ദുത്വ ശക്തികളുടെ സൈബര്‍ പോലീസിങ്ങിനെതിരേ ജാഗരൂകരായിരിക്കേണ്ടതുണ്ട്.
ഒളിപ്പോരും കേരളത്തിലെ പ്രബലമായ സവര്‍ണ സാമാന്യബോധത്തെ പലരീതിയില്‍ പുനരുല്‍പ്പാദിപ്പിക്കുന്നുണ്ട്. കേരളാധുനികതയുടെ ദാര്‍ശനിക വിധാതാവായ നാണുവാശാന്റെ ജീവിതത്തേയും പരിവ്രാജകത്വത്തേയും തന്നെ ചോദ്യം ചെയ്യുന്ന ഒരു ഗാര്‍ഹിക പ്രശ്‌നം കുമാരന്‍ നാടകം മുടക്കിക്കൊണ്ട് ഉന്നയിക്കുന്നു. സാമാന്യബോധത്തില്‍ തികച്ചും പ്രധാനമായ ചോദ്യമാണിത്. എന്നാല്‍ പുരുഷാശ്രിതമായ ഒരു കുടുംബ സംവിധാനത്തിന്റെ തന്നെ പൊളിച്ചെഴുത്തും ആണ്‍കോയ്മാ സ്ഥാപനമായ കുടുംബത്തിന്റേയും വിവാഹത്തിന്റേയും നവീകരണവും വിമര്‍ശവും കൂടി നാണുവാശാന്റെ ഗാര്‍ഹസ്ഥ്യപരിത്യാഗത്തിലുള്‍ച്ചേരുന്നു എന്നതാണ് കൂടുതല്‍ ഗഹനമായ കാഴ്ച്ചയുടെ വിമോചന സാധ്യത.

_________________________________

കലാഭവന്‍ മണി അവതരിപ്പിക്കുന്ന കുമാരന്‍ ചിത്രത്തിലേ നായകനേയും കവിഞ്ഞ് കേരളത്തിന്റെ കീഴാള ചേതനയെ മുഴുവന്‍ ഉള്‍ക്കൊള്ളുന്ന അടിത്തട്ടില്‍ നിന്നുള്ള ശബ്ദവും ഭാഷണവും മാനവചേതനയുമായി പരിണമിക്കുന്നു ഒളിപ്പോരില്‍. അജയനെന്ന സൈബര്‍ ഒളിപ്പോരാളിയുടെ പോരാട്ടവും ചെറുത്തു നില്‍പ്പും അസ്ഥാനത്താക്കിക്കൊണ്ട് മണ്ണില്‍ നിന്നും അധ്വാനജീവിതത്തില്‍ നിന്നും ഉയര്‍ന്നു വരുന്ന കുമാരന്‍ കേരളത്തിന്റെ ഭുതത്തേയും വര്‍ത്തമാനത്തേയും കുറിച്ചുള്ള കൂടുതല്‍ നിര്‍ണായകവും ആകുലവുമായ ചോദ്യങ്ങള്‍ ചോദിക്കുന്നു. പക്ഷേ ചോദ്യം ചോദിക്കുന്നവരുടെ ഗതി ആത്മഹത്യയായി ഭവിക്കുന്ന സാമൂഹ്യമായ കൊലപാതക സന്ദർഭമാണ് നമ്മുടേതെന്ന് അയാളുടെ ഭാഗഥേയവും വ്യക്തമാക്കുന്നു

_________________________________

2500 വര്‍ഷം മുമ്പുനടന്ന തഥാഗതന്റെ കിരീടവും രാജ്യവും ഭാര്യയും മകനുമുപേക്ഷിച്ചുളള പലായനം യഥാര്‍ഥത്തില്‍ ശാക്യരും കോലിയരും തമ്മിലുള്ള യുദ്ധത്തിന്റേയും നരഹത്യയുടേയും ഭീഷണമായ സന്ദര്‍ഭത്തിലാണെന്നും അതിനെ ഒഴിവാക്കാനായിരുന്നു എന്നും ഇന്ത്യയുടെ നവബുദ്ധനായ അംബേദ്കര്‍ വിപുലവും അഗാധവുമായ നൈതിക ചരിത്രബോധത്തോടെ ദലിതബഹുജനങ്ങള്‍ക്കായി വിമോചനാത്മകമായി വായിച്ചെടുത്തിട്ടുണ്ട്. സമാനമായ രീതിയില്‍ ജാതിയും ബ്രാഹ്മണ്യവും സവര്‍ണ ഹിംസയും വംശഹത്യാപരമായ അധീശ പൊതുബോധവും കുരുതിക്കളമാക്കിയെ മാബലിയുടേയും മാവേലിക്കര, കരുമാടി, കോട്ടപ്പുറം, പട്ടണം കുട്ടന്മാരുടേയും (ബുദ്ധന്റെ ഗ്രാമ്യരൂപവും പേരും) കൂടി സ്വന്തം രാജ്യമായ കേരളത്തെ വര്‍ണവെറിയില്‍ നിന്നും മോചിപ്പിക്കാനും പത്താം നൂറ്റാണ്ടു മുതല്‍ ചാതുര്‍വര്‍ണ്യവും ജാതിവ്യവസ്ഥിതിയും സ്ഥാപിച്ച് കേരളത്തെ കിരാതമാക്കിയ സവര്‍ണ മണിപ്രവാള ഹിന്ദുബ്രാഹ്മണ സംസ്‌കാരാധീശത്തത്തില്‍ നിന്നും വിടുതല്‍ ചെയ്ത് ജനകീയവും ജനായത്തപരവും നൈതികവും വിമോചനാത്മകവുമായ കാരുണ്യത്തിന്റേയും മൈത്രിയുടേയും ജ്ഞാനത്തിന്റേയും ധര്‍മ മാര്‍ഗം തിരിച്ചു പിടിക്കാനുമായിരുന്നു കാളിയേയുപേക്ഷിച്ചുള്ള നാണുഭക്തന്റെ തെരുവുതെണ്ടലും പുതിയ വിമോചന പാതകളും കേരളയാനങ്ങളും.
കലാഭവന്‍ മണി അവതരിപ്പിക്കുന്ന കുമാരന്‍ ചിത്രത്തിലേ നായകനേയും കവിഞ്ഞ് കേരളത്തിന്റെ കീഴാള ചേതനയെ മുഴുവന്‍ ഉള്‍ക്കൊള്ളുന്ന അടിത്തട്ടില്‍ നിന്നുള്ള ശബ്ദവും ഭാഷണവും മാനവചേതനയുമായി പരിണമിക്കുന്നു ഒളിപ്പോരില്‍. അജയനെന്ന സൈബര്‍ ഒളിപ്പോരാളിയുടെ പോരാട്ടവും ചെറുത്തു നില്‍പ്പും അസ്ഥാനത്താക്കിക്കൊണ്ട് മണ്ണില്‍ നിന്നും അധ്വാനജീവിതത്തില്‍ നിന്നും ഉയര്‍ന്നു വരുന്ന കുമാരന്‍ കേരളത്തിന്റെ ഭുതത്തേയും വര്‍ത്തമാനത്തേയും കുറിച്ചുള്ള കൂടുതല്‍ നിര്‍ണായകവും ആകുലവുമായ ചോദ്യങ്ങള്‍ ചോദിക്കുന്നു. പക്ഷേ ചോദ്യം ചോദിക്കുന്നവരുടെ ഗതി ആത്മഹത്യയായി ഭവിക്കുന്ന സാമൂഹ്യമായ കൊലപാതക സന്ദർഭമാണ് നമ്മുടേതെന്ന് അയാളുടെ ഭാഗഥേയവും വ്യക്തമാക്കുന്നു. തീവ്രവും ചടുലവും വിക്ഷോഭജനകവുമായ സംഗീതത്തിലൂടെ ശക്തമായ രാഷ്ട്രീയ സന്ദേശങ്ങളും വിമര്‍ശവും ബഹുജന ചേതനയിലേക്കു കടത്തിവിടാനുള്ള ശ്രമം ഗാനരചനയിലൂടെ നടത്തിയിരിക്കുന്നത് ഏറെ ശ്രദ്ധേയവും വിമോചനാത്മകവുമാണ്. നാണുവാശാന്റെ പ്രാര്‍ഥനാഗീതം ദൃശ്യവല്‍ക്കരിച്ചിരിക്കുന്നതും വളരെ ചടുലവും കാലികവുമായ എഡിറ്റിങ്ങ് ഭാഷയിലും ദൃശ്യപരിചരണത്തിലൂടെയുമാണ്. സറീനയുടെ അമ്മയായുള്ള മുഹൂര്‍ത്തങ്ങളും തലൈവാസല്‍ വിജൈയുടെ അന്ധനായ അപ്പൂപ്പന്‍ കഥാപാത്രവുമെല്ലാം ഏറെ ഹൃദ്യവും നാടകീയവും അനന്യവുമാണ്. അജയന്റെ ജീവിതത്തിലൂടെ യഥാര്‍ഥത്തില്‍ കേരളത്തിന്റെ തന്നെ കഴിഞ്ഞ നാലു പതിറ്റാണ്ടുകളിലെ വര്‍ത്തമാന ചരിത്രവും സംസ്‌കാര പരിണാമങ്ങളുമാണ് ചിത്രം ആഖ്യാനത്തിലേക്കു വിന്യസിക്കുന്നത്. ഈ രീതിയില്‍ കേരള ആധുനികതയുടേയും ജനായത്തത്തിന്റേയും സമൂഹത്തിന്റേയും ഒരു വിമര്‍ശ വീക്ഷണവും ചലച്ചിത്രസമീക്ഷയും കൂടിയാകുന്നു ഈ ഗറില്ലാച്ചിത്രം. ബഹുജന ചേതനയേയും രാഷ്ട്രീയത്തേയും കൂടുതല്‍ ആകര്‍ഷിക്കുവാനും ഉള്‍ക്കൊള്ളിക്കാനും നവീകരിക്കാനുമുതകുന്ന ചലച്ചിത്ര പരിശ്രമങ്ങള്‍ ശശിയുടേയും ഗോപിയുടേയും കൂട്ടുകെട്ടില്‍ നിന്നും നാം പ്രതീക്ഷിക്കുന്നു.
______________________
ഡോ. അജയ് ശേഖര്‍ :- അസി. പ്രൊഫസര്‍ ഓഫ് ഇംഗ്ലീഷ്, സംസ്‌കൃത സര്‍വകലാശാല – തിരൂര്‍ കേന്ദ്രം, തിരുനാവായ പോസ്റ്റ് 676 301