കെ. അഷ്റഫ്

മണ്ഡലിനു ശേഷം കാമ്പസുകളുടെ ദൈനംദിന ജീവിതത്തില്‍ കീഴാളവിദ്യാര്‍ഥികള്‍ എങ്ങിനെ പ്രതിനിധീകരിക്കപ്പെടുന്നു എന്ന പ്രശ്നമായി കാണെണ്ടതുണ്ട്. തുടരുന്ന ദലിത് വിദ്യാര്‍ഥികളുടെ ആത്മഹത്യകള്‍, എസ്.എഫ്.ഐ അടക്കമുള്ളവര്‍ കാമ്പസുകളില്‍ നടത്തുന്ന മര്‍മറിങ് കാമ്പയിനുകള്‍, കാമ്പസ് സൌഹൃദങ്ങളിലെ ജാതി/ മത/ ലിംഗ ബലതന്ത്രങ്ങള്‍, ക്ളാസ്റൂമുകളിലെ കീഴാളവിദ്യാര്‍ഥികളുടെ അനുഭവങ്ങള്‍ മുതലുള്ള നിരവധി daily humiliation സവിശേഷമായ രാഷ്ട്രീയ പ്രശ്നമായി നാം കാണേണ്ടതുണ്ട്. ഇത് ഇലക്ഷന്‍ രാഷ്ട്രീയത്തെയും പാര്‍ട്ടികളുടെ നയസമീപനങ്ങളെയും മാത്രം മുന്‍നിര്‍ത്തിയുള്ള ഇടതുപക്ഷ കാമ്പസ് വ്യവഹാരങ്ങളുടെ പ്രതിലോമപരതകൂടി തുറന്നു കാട്ടാന്‍ഉതകുന്നതാണ്.

ഏപ്രില്‍ 15ലെ ഡല്‍ഹി മുന്‍സിപ്പല്‍ കോര്‍പ്പറേഷന്‍ ഇലക്ഷനില്‍ മല്‍സരിച്ച ജാമിഅ മില്ലിയ യസര്‍വകലാശാലയിലെ പൊളിറ്റിക്കല്‍ സയന്‍സ് ബിരുദ വിദ്യാര്‍ഥിയും ബട്ലാ ഹൌസ് സ്വദേശിയുമായ സിയാഉര്‍റഹ്മാന്‍ നമ്മുടെ വാര്‍ത്താമാധ്യമങ്ങളിലൊന്നും സാന്നിദ്ധ്യമറിയിച്ചില്ല. കുപ്രസിദ്ധരായ ഡല്‍ഹി പോലീസ് സ്പെഷ്യല്‍ സെല്‍ ഡിസൈന്‍ ചെയ്ത, 2008ല്‍ ബട്ല  ഹൌസില്‍ , ‘വ്യാജ ഏറ്റുമുട്ടല്‍ കൊലപാത’കത്തിന് ശേഷം ഇന്ത്യന്‍ മുജാഹിദീന്‍ ബന്ധം ആരോപിച്ച് അറസ്റ് ചെയ്യപ്പെട്ട ‘ഭീകരവാദി’യാണ് സിയാഉര്‍ റഹ്മാന്‍. ജാമിഅ മില്ലിയ സര്‍വ്വകലാശാലയിലെ വിദ്യാര്‍ഥികള്‍ നടത്തിയ ഐതിഹാസിക പ്രക്ഷോഭത്തെത്തുടര്‍ന്ന് ബട്ല ഹൌസില്‍ പോലീസിന്റെ തിരക്കഥ പൊളിയുകയും, നിരപരാധിത്വം തെളിഞ്ഞ് സാധാരണ ജീവിതത്തിലെക്ക് തിരിച്ചുവരുന്നതിനിടയിലാണ് അഹമ്മദാബാദ് സ്ഫോടനം തലയില്‍ കെട്ടിവെട്ടിക്കപ്പെട്ടത്. സാക്ഷാല്‍ മോഡി ഭരിക്കുന്ന ഗുജറാത്തിലെ സബര്‍മതി ജയിലിലാണ് സിയാഉര്‍ റഹ്മാന്‍ അടക്കപ്പെട്ടത്. ഈ ജയിലില്‍ കിടന്നാണ് സിയാഉര്‍ റഹ്മാന്‍ ഡല്‍ഹി മുന്‍സിപ്പല്‍ ഇലക്ഷനില്‍ കോണ്‍ഗ്രസും ബി.ജെ.പിയുമുള്‍പ്പെട്ട മുഖ്യധാര രാഷ്ട്രീയ കക്ഷികള്‍ക്കെതിരെ മത്സരിക്കുന്നത്. ഞാനും ഈ രാജ്യത്ത് ജീവിച്ചിരിക്കുന്നു എന്ന് തെളിയിക്കാനാനും ഉറക്കെ വിളിച്ച് പറയാനുമാണ് സിയാഉര്‍റഹ്മാന്‍ സ്ഥാനാര്‍ഥിയുടെ കുപ്പായം അണിഞ്ഞത്.

On October 24, 2008, Jamia Teachers Solidarity Group organised a rally to Parliament in New Delhi to protest against profiling of minorities in the country and to demand a judicial enquiry in the Jamia “Encounter”.

ഇന്ത്യന്‍ കാമ്പസുകളിലെ ചെറിയ ചലനങ്ങള്‍ പോലും ഒപ്പിയെടുക്കുന്നുവെന്ന് അവകാശപ്പെടുന്ന പത്രമാധ്യമങ്ങളും ഡല്‍ഹി കേന്ദ്രീകരിച്ച് രാഷ്ട്രീയ പ്രവര്‍ത്തനം നടത്തുന്ന പാര്‍ട്ടികളും ഔപചാരിക ജനാധിപത്യപ്രക്രിയയുടെ ഭാഗമായ വിദ്യാര്‍ഥി സംഘടനകളും സിയാഉര്‍റഹ്മാനെക്കുറിച്ചും അവന് പിന്തുണ പ്രഖ്യാപിച്ചുകൊണ്ട് ജാമിഅ മില്ലിയ യൂണിവേഴ്സിറ്റിയിലെ ഒരു സംഘം വിദ്യാര്‍ഥികള്‍ നടത്തുന്ന പ്രക്ഷോഭത്തെക്കുറിച്ച് അറിഞ്ഞമട്ടില്ല. കേന്ദ്രസര്‍വ്വകലാശാലകളില്‍ പട്ടി സംരംക്ഷണം മുതലുള്ള ചെറുതും വലുതുമായ അവകാശസംരക്ഷണ പ്രക്ഷോഭങ്ങളെക്കുറിച്ച് വാര്‍ത്തകള്‍ പുറത്തുവിടുന്ന ഒരൊറ്റമാധ്യമവും സിയാഉര്‍റഹ്മാനെ കണ്ടമട്ടില്ല. ജെ.എന്‍.യുവില്‍ തുമ്മിയാല്‍ ഏറ്റുതുമ്മുന്ന കേരളത്തിലെ മാധ്യമങ്ങള്‍ക്കും സിയാഉര്‍റഹ്മാന്റെ നിലനില്‍പ്പിനായുള്ള പോരാട്ടം വാര്‍ത്താമൂല്യമുള്ളതോ രാഷ്ട്രീയമൂല്യമുള്ളതോ ആയി അനുഭവപ്പെട്ടില്ല.

ഇത്രയും പറയുന്നത് ഇക്കഴിഞ്ഞ മാസം മുഴുവന്‍ കേരളത്തിലെ ഒരുവിഭാഗം മാധ്യമങ്ങളില്‍ ജെ.എന്‍.യു കേന്ദ്രീകരിച്ച് നിലനില്‍ക്കുന്ന ഇടതുപക്ഷ വിദ്യാര്‍ഥി രാഷ്ട്രീയ ഗൃഹാതുര വ്യവസായത്തെ കുറിച്ച് വിശകലനം സാധ്യമാക്കാനാണ്. ഇടതുപക്ഷ പരിഷ്കരണവാദം സ്വയം അജണ്ടയായി സ്വീകരിച്ചിട്ടുള്ള ഇത്തരം മാധ്യമങ്ങള്‍ ജെ.എന്‍.യുവില്‍ കഴിഞ്ഞ കുറേ വര്‍ഷങ്ങളായി നടക്കുന്ന സംവരണ അട്ടിമറിയെക്കുറിച്ചോ എസ്.സി/എസ്.ടി, ഒ.ബി.സി വിദ്യാര്‍ഥികളുടെ ജെ.എന്‍.യുവിലേക്കുള്ള അഡ്മിഷന്‍ തടയുന്നതില്‍, കേളികേട്ട പുരോഗമന ഇടതുപക്ഷ ബുദ്ധിജീവികള്‍ വഹിച്ച പങ്കിനെക്കുറിച്ചോ ഒരു വരി പോലും എഴുതിയിട്ടില്ല എന്നതാണ് ഏറ്റവും ഗൌരവമേറിയ വസ്തുത. ഇത്തരമൊരു മാധ്യമ അദൃശ്യതയുടെ സാഹചര്യത്തിലാണ് സിയാഉര്‍ റഹ്മാനെന്ന ജാമിഅ വിദ്യാര്‍ഥി (മുഖ്യധാര വ്യവഹാരങ്ങളില്‍ ഭീകരവാദി) നടത്തുന്ന രാഷ്ട്രീയ പ്രക്ഷോഭത്തിന്റെ പ്രസക്തി ഏറുന്നത്.

തൊണ്ണൂറുകള്‍ക്ക് ശേഷമുള്ള ദലിത് ബഹുജന്‍ കാമ്പസ് രാഷ്ട്രീയം
സമകാലിക കാമ്പസുകളെ മുന്‍നിര്‍ത്തിയുള്ള ചര്‍ച്ച വിശാലാര്‍ഥത്തില്‍ 90കള്‍ക്ക് ശേഷമുള്ള കാമ്പസുകളോടുള്ള സമീപനത്തിന്റെ പ്രശ്നം തന്നെയാണ്. മുന്‍കാല ഇടതുപക്ഷ വിദ്യാര്‍ഥി രാഷ്ട്രീയവുമായി ബന്ധപ്പെട്ടവര്‍ നടത്തുന്ന മാധ്യമ സ്ഥാപനങ്ങളായാലും ഇടതുപക്ഷ വിദ്യാര്‍ഥി സംഘടനകളായാലും 90കള്‍ക്ക് ശേഷമുള്ള കാമ്പസുകളെ ആഗോളീകരണമെന്ന മുതലാളിത്ത പ്രത്യയശാസ്ത്രം തകര്‍ത്തെറിഞ്ഞ്, ഛിന്നഭിന്നമാക്കപ്പെട്ട, ഇടങ്ങളായാണ് പരിഗണിക്കുന്നത്. മാത്രമല്ല, മത-ജാതി-വര്‍ഗ്ഗീയത ആഗോളീകരണത്തിന്റെ ഉപോല്‍പന്നമായി കാമ്പസുകളില്‍ ശക്തിപ്പെട്ടു എന്നും പറയുന്നുണ്ട്. എന്നാല്‍ ഈ വിശകലനങ്ങള്‍ അദൃശ്യമാക്കുന്നത് മണ്ഡല്‍ കമ്മീഷന് ശേഷം വന്ന ഒ.ബി.സി, എസ്.സി/ എസ്.ടി വിദ്യാര്‍ഥികള്‍ അണിനിരക്കുന്ന പലതരത്തിലുള്ള വിദ്യാര്‍ഥി കൂട്ടായ്മകള്‍, 90കള്‍ വരെ നിലനിന്നിരുന്ന ഇന്ത്യന്‍ കാമ്പസുകളുടെ ഉന്നതജാതി ഉള്ളടക്കത്തെ സന്നിഗ്ധമാക്കിയ രാഷ്ട്രീയസന്ദര്‍ഭമാണ്. ആഗോളീകരണം മത-ജാതി-വര്‍ഗ്ഗീയത തുടങ്ങിയ ഇടതുപക്ഷരാഷ്ട്രീയത്തിന്റെ ഫ്രെയിമുകള്‍ ബഹിഷ്കരിക്കുന്നത് മണ്ഡലിന് ശേഷമുള്ള കീഴാള വിദ്യാര്‍ഥികളുടെ പലതരത്തിലുള്ള ഉയര്‍ത്തെഴുന്നേല്‍പ്പിനെയും നിലനില്‍പ്പിനെയുമാണ്. ആഗോളീകരണത്തെ മുന്‍നിര്‍ത്തി കാമ്പസ് രാഷ്ട്രീയത്തിന്റെ അന്ത്യം പ്രവചിക്കുന്ന ഇടതുപക്ഷവ്യവഹാരങ്ങള്‍ മറ്റൊരുവിധത്തില്‍ ചെയ്യുന്നത്

Students Protest Against UPA’s Assaults on Democratic Voices, Tribals and Minorities !

ദലിത് ബഹുജന്‍ സാന്നിധ്യം ഉന്നയിക്കുന്ന കാമ്പസിനെക്കുറിച്ചുള്ള പുതിയ ഭാവനകളെ നിയന്ത്രിക്കുകയും പുതിയ തരത്തിലുള്ള രാഷ്ട്രീയത്തിന്റെ സാധ്യതകളെ ഇല്ലായ്മ ചെയ്യുകയുമാണ്. അതായത് മണ്ഡല്‍കമ്മീഷന് ശേഷം വ്യത്യസ്ത മത/ജാതി/ലിംഗ/പ്രദേശ അധികാരങ്ങള്‍ കാമ്പസുകളില്‍ എങ്ങിനെയാണ് സ്വയമാവിഷ്കരിക്കുന്നതെന്നും പുനര്‍നിര്‍മ്മിക്കുന്നതെന്നുമുള്ള നവജനാധിപത്യ പ്രശ്നമാണ് കാമ്പസുകളില്‍ ഉന്നയിക്കപ്പെട്ടത്.

തൊണ്ണൂറുകള്‍ക്ക് ശേഷമുള്ള ദലിത്-ബഹുജന്‍ സാന്നിധ്യത്തെ കേവലാര്‍ഥത്തിലുള്ള അരിക് വത്കരണ (marginalisation) ത്തിന്റെ പ്രശ്നമായോ വര്‍ഗ്ഗമെന്ന പരികല്‍പ്പനയുടെ മലിനീകരണ (contamination) ത്തിലൂടെയോ മറികടക്കാമെന്നാണ് ഇടതു പരിഷ്കരണവാദികള്‍ (‘നോ മണ്ഡല്‍, നോ റിസര്‍വേഷന്‍’ എന്ന മുദ്രാവാക്യമുയര്‍ത്തി) ഐസയടക്കമുള്ളവരെ ഉപദേശിക്കുന്നത്. എസ്.എഫ്.ഐ അടക്കമുള്ളവര്‍ 90കള്‍ക്ക് ശേഷമുള്ള മാറ്റങ്ങളെ അഭിസംബോധന ചെയ്യുന്നത് കുറച്ച് ദലിത് വിദ്യാര്‍ഥികള്‍ക്ക് പദവി നല്‍കിക്കൊണ്ടുള്ള ടോക്കണിസത്തിലൂടെയും എ.ബി.വി.പിയുടെ വളര്‍ച്ച ചൂണ്ടിക്കാണിച്ച് മുസ്ലിം വിദ്യാര്‍ഥികളെ വിരട്ടിനിര്‍ത്തി നേടുന്ന മുസ്ലീം രക്ഷകപദവി (muslim saviour) യിലൂടെയുമാണ്. എസ്.എഫ്.ഐയുടെ പ്രസിഡന്റും ദലിതനുമായ പി.കെ ബിജുവിന്റെ അനുഭവകഥനത്തെ (മാത്യഭൂമി ആഴ്ചപതിപ്, 2008 ഡിസംബര്‍ 16) മുന്‍ നിര്‍ത്തി ഇടതുപക്ഷ പ്രസ്ഥാനങ്ങള്‍ക്ക് അകത്തെ ദലിത് പ്രതിനിധാനത്തെ കുറിച്ച ചര്‍ച്ചയില്‍ ഇടപെട്ടുകൊണ്ട് അരുണ്‍ എ നടത്തിയ നിരീക്ഷണം ഈ അര്‍ഥത്തില്‍ പ്രസക്തമാണ്. “ദലിത് തന്മയുടെ പ്രതിനിധാനമായി പി.കെ ബിജു അവതരിപ്പിക്കപ്പെടുന്നത്  മാര്സിസതിന്റെ വരെന്ന്യ കാഴ്ചപ്പാടില്‍ നിന്ന് കൊണ്ടാണു, ദലിത് എന്ന പരികല്‍പനയുടെ നിര്‍മ്മിതിയില്‍ അന്തര്‍ലീനമായ ജാതിയെ സവിശേഷമായി അംഗീകരിക്കുന്നത് കൊണ്ടല്ല. മറിച്ച്, വര്‍ത്തമാന കാലഘടത്തില്‍ ഈ പരികല്‍പന നിര്‍മ്മിച്ച സാംസ്കാരിക അവബോധത്തെയും രാഷ്ട്രീയ മുന്നേറ്റത്തെയും ഒരു ദലിത് നാമധാരിയിലൂടെ സമര്തിക്കാമെന്ന  വ്യാമേഹത്താലാണ്’ ‘(അഷ്റഫ്, 2010). സംവരണത്തെ വിലകുറഞ്ഞ ‘പോസിറ്റീവ് ഡിസ്ക്രിമിനേഷന്‍’ ആയിക്കാണുന്ന ഇത്തരം വിദ്യാര്‍ഥി സംഘടനകള്‍ മണ്ഡല്‍ കമ്മീഷന്‍ ഉണ്ടാക്കിയ മാറ്റങ്ങള്‍ ഇടതുപക്ഷ ഗൃഹാതുരത്വത്തെ മുന്‍നിര്‍ത്തിയുള്ള കെട്ടുകഥകളിലൂടെ മറച്ചുപിടിക്കാനാണ് ശ്രമിക്കുന്നത്. 90കള്‍ക്ക് ശേഷമുള്ള രാഷ്ട്രീയമാറ്റത്തെ ആഗോളീകരണം, മതജാതി വര്‍ഗ്ഗീയത തുടങ്ങിയ ഇടതുപക്ഷ ചട്ടക്കൂടുകളില്‍ നിന്ന് മാറി ജാതിയുടെ സവിശേഷ പ്രശ്നമായിത്തന്നെ നാം പരിഗണിക്കേണ്ടതുണ്ട്.
“The anti –Mandal campaign was at root and anti-reservation campaign. Implicated thus in the conflict, Dalits were forced to defend the concept of reservation itself, in addition to OBC reservation.In this moment of crisis caste surfaced as radically transformed phenomenon, giving rise to new language of Indian politics.”(താരു&സത്യനാരായണ, 2011) 90കള്‍ക്ക് ശേഷം ഇന്ത്യയില്‍ ഒ.ബി.സി, എസ്.സി/ എസ്.ടി വിദ്യാര്‍ഥികളുടെ മുന്‍കൈയില്‍ വികസിച്ചുവന്ന ഇന്ത്യന്‍ രാഷ്ട്രീയത്തിന്റെ തന്നെ പുതിയ ജനാധിപത്യഭാഷയെ പഴകിയ ഇടതുപക്ഷ ഗൃഹാതുരത്വം കൊണ്ടോ ദലിത് വിദ്യാര്‍ഥികളെ മുന്‍നിര്‍ത്തിയുള്ള ടോകണിസം കൊണ്ടോ രക്ഷകവേഷം കൊണ്ടോ മറച്ചുപിടിക്കാനാണ് ഇടതുപക്ഷ വിദ്യാര്‍ഥി സംഘടനകളും ശ്രമിക്കുന്നതെന്ന് പറഞ്ഞാല്‍ അതിശയോക്തിയാകുന്നില്ല. ഇത്തരമൊരു പ്രശ്നത്തിലേക്ക് കടക്കുന്നതിന് ഏറെ കൊട്ടിഘോഷിക്കപ്പെടുന്ന ജെ.എന്‍.യുവിലെ വിദ്യാര്‍ഥി രാഷ്ട്രീയത്തെയും സംവരണത്തെയും സാമാന്യമായി വിലയിരുത്തേണ്ടതുണ്ട്.

ജെ.എന്‍.യു: ഇടതല്ലാത്ത വാര്‍ത്തകള്‍
മണ്ഡല്‍ കമ്മീഷന്‍ കാലഘട്ടത്തില്‍ അതിനെ എതിര്‍ക്കുന്നതില്‍ മുന്‍പന്തിയില്‍ നിന്ന ഇടതുപക്ഷ- ലിബറല്‍-ഗാന്ധിയന്‍ മുന്നണി ഏറെ വിമര്‍ശിക്കപെട്ടതാണ് (ബാലഗോപാല്‍, 1990). ജെ.എന്‍. യുവിലെ കഥ ഇപ്പോഴും വ്യത്യസ്തമല്ല. ‘ജെ.എന്‍.യുവിലെ ജാതിപരമായ അനീതി’ എന്ന ലേഖനത്തില്‍ ജോഷില്‍.കെ.എബ്രഹാമും എസ്. സന്തോഷും പറയുന്നത് പിന്നാക്ക വിഭാഗങ്ങളുടെ പ്രതിനിധാനത്തെയും ജനാധിപത്യ പങ്കാളിത്തത്തെയും പരിശോധിക്കുമ്പോള്‍ ഇന്ത്യയിലെ ഒരു യാഥാസ്ഥിതിക കാമ്പസ് മാത്രമാണ് ജെ.എന്‍. യു എന്നാണ് (സന്തോഷ് & എബ്രാഹാം, 2010). പ്രസ്തുത ലേഖനത്തില്‍ 2008 മുതലുള്ള എസ്.സി/എസ്.ടി, ഒ.ബി.സി സംവരണ അട്ടിമറികളുടെ നിരവധി കഥകള്‍ ലേഖകര്‍ ചൂണ്ടിക്കാണിക്കുന്നു. മേല്‍ക്കോയ്മയുള്ള ജാതികളെ മുന്‍നിര്‍ത്തിയുള്ള ജനാധിപത്യ വിരുദ്ധമായ ‘മെറിറ്റോക്രസി’ മാത്രമാണ് ജെ.എന്‍.യുവിന്റെ രാഷ്ട്രീയം. ജെ.എന്‍.യുവില്‍ ഒ.ബി.സി അഡ്മിഷനില്‍ നടന്ന അട്ടിമറി 2009-2010 അക്കാദമിക് വര്‍ഷത്തെ കണക്കുകള്‍ പരിശോധിച്ചാല്‍ വളരെ വ്യക്തമാണ്. ജെ.എന്‍.യുവിലെ പ്രസ്റീജ് സെന്ററുകളിലൊന്നായ സ്കൂള്‍ ഓഫ് സോഷ്യല്‍ സയന്‍സിലെ സെന്റര്‍ ഓഫ് എക്കണോമിക്സില്‍ ആകെയുള്ള 123 സീറ്റുകളില്‍ 22 എണ്ണമാണ് ഒ.ബി.സി വിഭാഗത്തിന് സംവരണം ചെയ്യപ്പെട്ടിട്ടുള്ളത്. അതില്‍ മൂന്ന് സീറ്റുകളില്‍ മാത്രമാണ് അഡ്മിഷന്‍ നടത്തിയത്. ഇത് നടത്തുന്നത് സുപ്രീംകോടതി 2008 ഒക്ടോബര്‍ 14 പുറപ്പെടുവിച്ച ഒ.ബി.സി കട്ട് ഓഫ് മാര്‍ക്കിനെ സംബന്ധിച്ച നിര്‍ദ്ദേശത്തെ ദുര്‍വ്യാഖ്യാനിച്ചാണ്. അതായത് യൂണിവേഴ്സിറ്റിയുടെ ജനറല്‍ കട്ട് ഓഫ് മാര്‍ക്കില്‍ നിന്ന് പത്ത് മാര്‍ക്ക് കുറച്ചാണ് ഒ.ബി.സി കട്ട് ഓഫ് മാര്‍ക്ക് എന്നാണ് സുപ്രീം കോടതി നിര്‍ദ്ദേശിച്ചത്. ഇതിന് ദുര്‍വ്യാഖ്യാനിച്ചാണ് സെന്റര്‍ ഫോര്‍ എക്കണോമിക്സിലും അതുപോലെതന്നെ സെന്റര്‍ ഫോര്‍ ഹിസ്റോറിക്കല്‍ സ്റഡീസിലെ 65 സീറ്റുകളില്‍ 12 എണ്ണം ഒ.ബി.സിക്കാര്‍ക്ക് അവകാശപ്പെട്ടതാണെങ്കില്‍ അഡ്മിഷന്‍ നല്‍കിയത് ഒരാള്‍ക്ക് മാത്രമാണ്. ഇത്തരം പ്രശ്നങ്ങളില്‍ ഐസയുടെയും, എസ്.എഫ്.ഐയുടെയും പരസ്പരാരോപണങ്ങളുടെ ചര്‍വ്വിത ചര്‍വ്വണങ്ങള്‍ക്കിടയില്‍ നഷ്ടപ്പെട്ടത്. പിന്നാക്ക വിദ്യാര്‍ഥികളുടെ പഠിക്കാനും ജീവിക്കാനുള്ള അവകാശം തന്നെയാണ്. ഇടതുവിദ്യാര്‍ഥി സംഘടനകളുടെ സംവരണത്തെക്കുറിച്ചും ജാതിയെക്കുറിച്ചുമുള്ള ആശയവ്യക്തതയില്ലായ്മകള്‍ പരിഹരിക്കുവോളം പിന്നാക്ക വിദ്യാര്‍ഥികള്‍ കാത്തിരുന്നുകൊള്ളണമെന്നാണ് മേല്‍ജാതി രക്ഷകന്മാരുടെ പുതിയ തിട്ടൂരങ്ങള്‍.
ജെ.എന്‍.യുവില്‍ നിന്നുള്ള വാര്‍ത്തകള്‍ നമുടെ മാധ്യമങ്ങള്‍ക്ക് ഇടതുപക്ഷത്തെക്കുറിച്ചുള്ള വാര്‍ത്തകള്‍ മാത്രമാണ്. എന്നാല്‍ ഇക്കഴിഞ്ഞ ജെ.എന്‍.യു ഇലക്ഷനില്‍, Break the politics of patronage, Reject the Brahmanical left എന്ന മുദ്രാവാക്യമുയര്‍ത്തി ഇന്ത്യന്‍ കാമ്പസുകളുടെ ചരിത്രത്തിലാധ്യമായി വ്യവസ്ഥാപിതമായ ഒരു ദലിത്-മുസ്ലിം സഖ്യം കാമ്പസ് ഫ്രണ്ടിന്റെയും ഓള്‍ ഇന്ത്യ ബഹുജന്‍ സ്റുഡന്റ് ഫെഡറേഷന്റെയും നേതൃത്വത്തില്‍ രൂപം കൊള്ളുകയും പത്ത് ശതമാനത്തോളം വോട്ടുകള്‍ അവര്‍ക്ക് സമാഹരിക്കാന്‍ കഴിയുകയും ചെയ്തു. ജെ.എന്‍.യുവിലും ഡല്‍ഹി യൂണിവേഴ്സിറ്റിയിലും എസ്.സി/എസ്.ടി, ഒ.ബി.സി സംവരണം വളരെ ആസൂത്രിതമായി അട്ടിമറിക്കുമ്പോഴും ഇത്തരം സാമൂഹിക സ്ഥാനത്ത് നിന്നുള്ള വിദ്യാര്‍ഥികള്‍ ടോകണിസത്തെയും രക്ഷകന്മാരെയും തിരസ്കരിച്ച് കൂടുതല്‍ അസേര്‍ട്ടീവായി കാണപ്പെടുന്നുണ്ട്

ബീഫ് ഫെസ്റിവെല്‍: ഉസ്മാനിയ സര്‍വ്വകലാശാലയും ജെ.എന്‍.യുവും
ഇന്ത്യന്‍ കാമ്പസുകളില്‍ ബീഫുമായി ബന്ധപ്പെട്ടുള്ള രാഷ്ട്രീയ ചര്‍ച്ചകള്‍ തുടക്കം കുറിക്കുന്നത് ഹൈദരാബാദ് കേന്ദ്രീകരിച്ചുള്ള സര്‍വ്വകലാശാലകളില്‍ നിന്നാണ്. ബീഫ് ഫെസ്റിവെല്ലുമായി ബന്ധപ്പെട്ട ചര്‍ച്ച പ്രത്യക്ഷത്തില്‍ ഭക്ഷണ സംസ്കാരത്തിന്റെ ജനാധിപത്യവത്കരണവുമായി ബന്ധപ്പെട്ടതാണെന്ന് പറയാമെങ്കിലും കാമ്പസുകളില്‍ ദലിത്-ബഹുജന്‍ വിദ്യാര്‍ഥികളുടെ സാന്നിധ്യമാണ് ബീഫിനെ ഒരു രാഷ്ട്രീയ പ്രമേയമാക്കി മാറ്റുന്നതെന്ന് കാഞ്ച ഐലയ്യ നിരീക്ഷിച്ചിട്ടുണ്ട്. ഇത്തരം പ്രശ്നങ്ങളോട് ആദ്യകാലങ്ങളില്‍ ജെ.എന്‍.യുവില്‍ നിന്നുള്ള ഇടതുപക്ഷവിദ്യാര്‍ഥികള്‍ പുറം തിരിഞ്ഞുനില്‍ക്കുക മാത്രമല്ല, ദലിത്-ബഹുജന്‍ വിദ്യാര്‍ഥികളുടെ പ്രശ്നം സ്റൈപ്പന്റ് സമരങ്ങളില്‍ ഒതുങ്ങിനിന്നതാണെന്നും എക്കാലത്തും വാദിച്ചുപോന്നിട്ടുണ്ട്. ഇക്കഴിഞ്ഞ ദിവസങ്ങളില്‍ ഉസ്മാനിയാ സര്‍വ്വകലാശാലയിലെ ബീഫ് ഫെസ്റിവെലിനെ ചുറ്റിപ്പറ്റി ഉണ്ടായ ചര്‍ച്ചകളും ജെ.എന്‍.യുവില്‍ നടന്ന ചര്‍ച്ചകളും പരിശോധിക്കുന്നത് ഇത്തരം പ്രശ്നങ്ങളില്‍ ഇടതുപക്ഷവിദ്യാര്‍ഥി സംഘടനകള്‍ നടത്തുന്ന ഇടപെടലുകളെ മനസ്സിലാക്കാന്‍ ഉതകുന്നതാണ്. ഉസ്മാനിയയില്‍ ബീഫ് ഫെസ്റ്വെല്ലിനെ പരസ്യമായി പിന്തുണക്കുന്ന എസ്.എഫ്.ഐ ജെ.എന്‍.യുവില്‍ ബീഫ് ഫെസ്റ്വെല്ലിനെ പരസ്യമായി പിന്തുണക്കാന്‍ തയ്യാറാകുന്നില്ല എന്ന് ജെ.എന്‍.യു ബീഫ് കാമ്പയിന്റെ കണ്‍വീനറായ പ്രേം ജിഷ് ആചാരി ഫസ്റ് പോസ്റ് എന്ന വെബ്സൈറ്റിന് നല്‍കിയ അഭിമുഖത്തില്‍ വ്യക്തമാക്കുകയുണ്ടായി. ദലിത്-ബഹുജന്‍ രാഷ്ട്രീയത്തിന്റെ ശക്തികേന്ദ്രങ്ങളായ ഹൈദരാബാദ് കാമ്പസുകളില്‍ ബീഫ് ഫെസ്റ്വെല്ലിനെ എസ്.എഫ്.ഐ പിന്തുണക്കുന്നത് തരംതാണ ടോക്കണിസമല്ലാതെ മറ്റൊന്നുമല്ലെന്ന് ഇതില്‍ നിന്ന് വ്യക്തമാണ്. ഇതിലൂടെ ശരിക്കും പുറത്തുവരുന്നത് എസ്.എഫ്.ഐയുടെ ജാതി തന്നെയാണ്. ദലിത്-ബഹുജന്‍ രാഷ്ട്രീയത്തെ സ്വാംശീകരിക്കാന്‍ ഹൈദരാബാദ് കാമ്പസുകളില്‍ നിര്‍ബന്ധിതരാകുന്ന എസ്.എഫ്.ഐ, ദലിത്-ബഹുജന്‍ രാഷ്ട്രീയം നിര്‍ണായക സാന്നിധ്യമല്ലാത്ത ജെ.എന്‍.യുവില്‍, ജാതി ശുദ്ധിയെ മലിനപ്പെടുത്തുന്ന ഒരു ഇടപെടലിനും തയ്യാറാകുന്നില്ലായെന്ന് തന്നെ പറയേണ്ടിവരും. മാത്രമല്ല, ദലിത്-ബഹുജന്‍ രാഷ്ട്രീയത്തിന്റെ സമ്മര്‍ദ്ദശേഷിയെ പ്രത്യക്ഷമാക്കുന്ന ബീഫ് ഫെസ്റിവെല്ലുകളെ സംഘ്പരിവാര്‍ വിപരീതം ഇടതുപക്ഷം തുടങ്ങിയ ദ്വന്ധങ്ങളില്‍ നിന്ന് വിടര്‍ത്തിക്കാണാന്‍ പര്യാപ്തമാക്കുന്നതാണ്.

പോസ്റ്-മണ്ഡല്‍ ദൈനംദിന രാഷ്ട്രീയം
ഇന്ത്യയില്‍ മണ്ഡലിന് ശേഷമുള്ള മാറ്റങ്ങളെ മനസ്സിലാക്കുന്നതിന് ഔപചാരിക ജനാധിപത്യരാഷ്ട്രീയ (formal democratic politics) ത്തിന് പുറത്തുള്ള മാറ്റങ്ങളെ കാണാന്‍ തയ്യാറാവണമെന്ന് ഗെയില്‍ ഓംവെദ് 90കളില്‍ എഴുതിയ ഏറെ പ്രശസ്തമായ Twice Born Riot against Democracy  എന്ന ലേഖനത്തില്‍ നിരീക്ഷിച്ചിരുന്നു. ഗെയില്‍ ഓംവെദിന്റെ ഭാഷയില്‍ പറഞ്ഞാല്‍ “Democracy for the exploited and oppressed means not simply formal political democracy, but also economic well-being and the bringing forward of all the forms in which their oppression is articulated”’. അതായത് ഗെയില്‍ ഓംവെദ് ഉന്നയിച്ച”അടിച്ചമര്‍ത്തലിന്റെ മുഴുവന്‍ രൂപങ്ങളും ” എന്നത് മണ്ഡലിനു ശേഷം കാമ്പസുകളുടെ ദൈനംദിന ജീവിതത്തില്‍ കീഴാളവിദ്യാര്‍ഥികള്‍ എങ്ങിനെ പ്രതിനിധീകരിക്കപ്പെടുന്നു എന്ന പ്രശ്നമായി കാണെണ്ടതുണ്ട്. തുടരുന്ന ദലിത് വിദ്യാര്‍ഥികളുടെ ആത്മഹത്യകള്‍, എസ്.എഫ്.ഐ അടക്കമുള്ളവര്‍ കാമ്പസുകളില്‍ നടത്തുന്ന മര്‍മറിങ് കാമ്പയിനുകള്‍, കാമ്പസ് സൌഹൃദങ്ങളിലെ ജാതി/ മത/ ലിംഗ ബലതന്ത്രങ്ങള്‍, ക്ളാസ്റൂമുകളിലെ കീഴാളവിദ്യാര്‍ഥികളുടെ അനുഭവങ്ങള്‍ മുതലുള്ള നിരവധി daily humiliation സവിശേഷമായ രാഷ്ട്രീയ പ്രശ്നമായി നാം കാണേണ്ടതുണ്ട്. ഇത് ഇലക്ഷന്‍ രാഷ്ട്രീയത്തെയും പാര്‍ട്ടികളുടെ നയസമീപനങ്ങളെയും മാത്രം മുന്‍നിര്‍ത്തിയുള്ള ഇടതുപക്ഷ കാമ്പസ് വ്യവഹാരങ്ങളുടെ പ്രതിലോമപരതകൂടി തുറന്ന് കാട്ടാന്‍ ഉതകുന്നതാണ്. കാരണം, പാര്‍ട്ടി മുന്നണിപ്പട (anguard) രൂപപെടുത്തുന്ന സമീപനങ്ങള്‍ കാമ്പസുകളിലെ പ്രശ്നങ്ങള്‍ സ്വയമേവ പരിഹരിച്ചു കൊള്ളുമെന്ന വിശ്വാസമാണ് ഇത്തരം സമീപനങ്ങളുടെ അടിസ്ഥാനം. ഇതില്‍ നിന്ന് മാറി, അഥവാ vanguard രാഷ്ട്രീയത്തില്‍ നിന്ന് ദൈനംദിന രാഷ്ട്രീയത്തിലേക്കുള്ള കാമ്പസുകളുടെ മാറ്റം ഇനിയും സൂക്ഷ്മമായി വിലയിരുത്തപ്പെടേണ്ടതാണ്.

ഹൈദരബാദി സര്‍വകലാശാലയിലെ കൈരളിയും. ദല്‍ഹി സര്‍വകാലശാലയിലെ മൈത്രിയും

കാമ്പസുകളില്‍ ദൈനദിന രാഷ്ട്രീയം മനസ്സിലാക്കുന്നതിന് കേരളത്തില്‍ നിന്നുള്ള മലയാളി വിദ്യാര്‍ഥികളുടെ ഡല്‍ഹി, ഹൈദരാബാദ് കാമ്പസ് ജീവിതത്തെ പരിശോധിക്കുന്നത് നന്നാവുമെന്ന് തോന്നുന്നു. ഡല്‍ഹി യൂണിവേഴ്സിറ്റിയിലെ മലയാളി കൂട്ടായ്മയായ മൈത്രിയും ഹൈദരാബാദ് കേന്ദ്ര സര്‍വ്വകലാശാലയിലെ കൂട്ടായ്മയായ കൈരളിയും പേര് സൂചിപ്പിക്കുന്നതുപോലെ ‘മതേതര’ വിദ്യാര്‍ഥി കൂട്ടായ്മകളാണ്. മറ്റ് പാര്‍ട്ടിക്കാര്‍ ഉണ്ടെങ്കിലും പൊതുവെ എസ്.എഫ്.ഐ പോലുള്ള വിദ്യാര്‍ഥി സംഘടനകളുടെ റിക്രൂട്ടിംഗ് ഉപകരണങ്ങളായി ഇത്തരം കൂട്ടായ്മകള്‍ പ്രവര്‍ത്തിക്കുന്നു. ഹൈദരാബാദ് സര്‍വ്വകലാശാലയിലെ കൈരളിയുടെ ഓണാഘോഷത്തിന്റെ ചെയര്‍മാന്‍ തൊട്ടടുത്ത വര്‍ഷം യൂണിവേഴ്സിറ്റി യൂണിയന്‍ ജനറല്‍ സെക്രട്ടറിയായി മാറുന്നത് പരിണാമപരമായ യാദൃശ്ചികതയൊന്നുമല്ല. ഇത്തരം കൂട്ടായ്മകള്‍ നിലനില്‍ക്കുന്നതു തന്നെ മലയാളി, കേരളീയത, ഓണം, കേരളീയ സംസ്കാരം, കസവുമുണ്ട്, സാരി, പൊട്ട് തുടങ്ങിയ മതേതര അവകാശവാദങ്ങളിലും ചിഹ്നങ്ങളിലുമൂന്നിയാണ്. ‘ഒരേ ഭാഷ സംസാരിക്കുന്ന’, ‘മലയാളത്തനിമ’യുള്ള, ‘കേരളത്തിന്റെ കൊച്ചുപതിപ്പായ’ തുടങ്ങിയ വിശേഷണങ്ങളോടെ തുടങ്ങി കൈരളിയുടെ ഫ്രഷേഴ്സ് ഡേ പരിപാടിയിലൂടെയാണ് രാജ്യത്തിന്റെ വിവിധ ഭാഗങ്ങളില്‍ നിന്നെത്തുന്ന മലയാളം സംസാരിക്കുന്ന വിദ്യാര്‍ഥികള്‍ കേരളം/ മലയാളി എന്ന സങ്കല്‍പ്പത്തിലേക്ക് പൂര്‍ണ്ണമായും എത്തുന്നത്. വര്‍ഷത്തെ പ്രധാനപ്പെട്ട പരിപാടി ഓണാഘോഷമാണ്. അന്നാണ് കേരളീയ കലകളെക്കുറിച്ചും ഭക്ഷണരീതികളെക്കുറിച്ചും വസ്ത്രധാരണത്തെക്കുറിച്ചും ശുദ്ധമലയാള സംഗീതത്തെക്കുറിച്ചുമൊക്കെ വിദ്യാര്‍ഥികള്‍ ബോധവത്കരിക്കപ്പെടുന്നത്. ഈ ഓണപ്പരിപാടികളില്‍ സവിശേഷമായ രീതിയില്‍ കീഴാളശരീരങ്ങള്‍ സവര്‍ണഭാഷക്കുള്ളില്‍ വിന്യസിക്കപ്പെടുകയും ചെയ്യുന്നത് കാണാന്‍ കഴിയും. ഊണ് വിളമ്പാനും കായികാധ്വാനം ചെയ്യാനും മുസ്ലിം-ഈഴവ-ദളിത് വിദ്യാര്‍ഥികള്‍ ആണ് പൊതുവെ ഉണ്ടാവാറുള്ളത്. ഇവര്‍ ആഘോഷത്തിന്റെ മുഖ്യസാന്നിധ്യമോ ഘടകമോ ആയി പരിഗണിക്കപ്പെടാതെ നിരാശരാവുകയും തങ്ങളുടെതായ സ്വകാര്യ സൌഹൃദവേദികളില്‍ ഇത്തരം കാര്യങ്ങള്‍ ചര്‍ച്ച ചെയ്ത് ജീവിക്കുകയും ചെയ്യുന്നു. ഓണാഘോഷത്തിന് ശേഷം ഫെയ്സ്ബുക്ക് പോലുള്ള സോഷ്യല്‍ നെറ്റ്വര്‍ക്കുകളില്‍ കസവുസാരി, കസവുമുണ്ട് ഇവയുടുത്ത ‘ആദര്‍ശമലയാളി’ സ്ത്രീപുരുഷന്മാരുടെ ഫോട്ടോ പോസ്റ് ചെയ്ത് തങ്ങളുടെ മലയാളി സ്വത്വത്തെ ആഘോഷിച്ച് നിലനിര്‍ത്തുന്നു. ഇത്തരം വിമര്‍ശനങ്ങളെ പലപ്പോഴും പരിഗണിക്കാറുള്ളത് കോല്‍ക്കളി, ദഫ്മുട്ട് പോലുള്ള മുസ്ലിം കലാരൂപങ്ങളെ ‘സവിശേഷ’മായി ഉള്‍പ്പെടുത്തി വിലകുറഞ്ഞ ബഹുസാംസ്കാരിക പ്രകടനങ്ങളിലൂടെയാണ്. ദലിത് പ്രതിനിധാനം എന്ന നിലയില്‍, നാടന്‍ പാട്ട് തുടങ്ങിയവയും ‘സംവരണം’ ചെയ്യാറുണ്ട്. ഈ അടുത്തകാലത്ത് ഹൈദരാബാദ് യൂണിവേഴ്സിറ്റിയില്‍ ദലിത് രാഷ്ട്രീയത്തിന്റെയോ മുസ്ലിം രാഷ്ട്രീയത്തിന്റെയോ ഭാഗമായി ഇതിനെ ചോദ്യം ചെയ്യുകയോ അല്ലെങ്കില്‍ മിനിമം ബീഫെങ്കിലും ഉള്‍പ്പെട്ട ഓണസദ്യ തയ്യാറാക്കണമെന്ന് ആവശ്യപ്പെടുമ്പോള്‍ അതിനെ പലതരത്തിലുള്ള ഒതുക്കല്‍ പ്രക്രിയകള്‍ക്ക് വിധേയമാക്കുകയും നിശബ്ദമാക്കുകയും ചെയ്യുന്നു. ഇങ്ങനെ നിശബ്ദമാക്കപ്പെട്ട നിരവധി വിദ്യാര്‍ഥികള്‍ സാംസ്കാരികമായ ബഹിഷ്കരണത്തിന് വിധേയമാകുന്നു. അവരോട് മറ്റുവിദ്യാര്‍ഥികള്‍ സൌഹൃദങ്ങള്‍ തന്നെ വിലക്കുകയും തീവ്രവാദികളായി ഒറ്റെപ്പെടുത്തുകയും ചെയ്യുന്നു. തീവ്രവാദമുദ്രകുത്തപ്പെട്ട പലരോടും “ഇങ്ങളും മലയാളിയാണല്ലേ” എന്ന് ഇത്തരം പരിണാമ രഹസ്യങ്ങളൊന്നുമറിയാത്ത നിഷ്കളങ്കര്‍ ചോദിച്ചുപോകുന്നത് ഈ ലേഖകന്‍ നേരിട്ട് കേട്ടിട്ടുണ്ട്. മാത്രമല്ല 2011 ല്‍ തന്നെ ഹൈദരാബാദ് കാമ്പസില്‍ ഇടതുപക്ഷ മലയാളി വ്യവഹാരങ്ങളെ എതിര്‍ത്തിരുന്ന ഒരു ഡസനോളം മുസ്ലിം വിദ്യാര്‍ഥികള്‍ വളരെ ആസൂത്രിതമായി കാമ്പസില്‍ നിന്ന് തുടര്‍പഠനത്തിനായുള്ള ശ്രമങ്ങള്‍ നടത്തുന്നതിനിടെ പുറത്താക്കപ്പെടുകയുണ്ടായി. അംബേദ്കര്‍ സ്റുഡന്റ്സ് അസോസിയേഷന്‍ (എ. എസ്. എ) പോലുള്ള വിദ്യാര്‍ഥി സംഘടകളുടെ ഇടപെടല്‍ ഫലമായി ചുരുക്കം ചിലര്‍ക്ക് അഡ്മിഷന്‍ നല്‍കപ്പെടുകയുണ്ടായി. കേരളത്തില്‍ നിന്നുള്ള കൈരളി എന്ന കൂട്ടായ്മ നിലവില്‍ വരുന്നത് തന്നെ എസ്.എഫ്.ഐയുടെ വോട്ട് ബാങ്ക് മലയാളി എന്ന വ്യവഹാരത്തിലൂടെ നിലനിര്‍ത്തുവാനും അതുവഴി മലയാളീ എന്ന മേല്‍ജാതി പ്രത്യയശാസ്ത്രത്തെ സംരക്ഷിച്ച് നിര്‍ത്താനും അങ്ങിനെ എ.എസ്.എ പോലുള്ള ഇന്ത്യന്‍ വിദ്യാര്‍ഥി രാഷ്ട്രീയത്തിന്റെ 90കള്‍ക്ക് ശേഷമുള്ള ഏറ്റവും ഗംഭീരമായ സമരങ്ങള്‍ക്ക് നേതൃത്വം നല്‍കിയ ഒരു അംബേദ്കറിസ്റ് പ്രസ്ഥാനത്തെ സമ്മര്‍ദ്ദപ്പെടുത്താനുമാണ്.

ഇക്കഴിഞ്ഞ ദിവസങ്ങളില്‍ ഹൈദരാബാദ് കൈരളി പോലെത്തന്നെ പ്രവര്‍ത്തിക്കുന്ന ദല്‍ഹി സര്‍വ്വകലാശാലയിലെ മലയാളിക്കൂട്ടായ്മയായ മൈത്രിയുടെ ഇലക്ഷനുമായി ബന്ധപ്പെട്ട് അവരുടെ ഫെയ്സ് ബുക്ക് കൂട്ടായ്മയിലും സൌഹൃദവേദികളിലും നടന്ന ചര്‍ച്ചകള്‍ ഇത്തരത്തില്‍ പ്രസക്തമാണ്. ആയിരക്കണക്കിന് ഒ.ബി.സി വിദ്യാര്‍ഥികള്‍ കഴിഞ്ഞ കുറെ വര്‍ഷങ്ങളായി സംവരണ അട്ടിമറിയിലൂടെ ആസൂത്രിതമായി പഠനാവസരം നിഷേധിക്കപ്പെടുന്ന ഒരു സ്ഥാപനമാണ് ഡല്‍ഹി സര്‍വ്വകലായെന്ന് ‘അക്കാദമിക് ഫോറം ഫോര്‍ ഒ.ബി.സി’ പോലുള്ള സംഘടനകള്‍ കണ്ടെത്തിയിരുന്നു. ഇത്തരം പ്രതികൂല സാഹചര്യത്തില്‍ തന്നെ മൈത്രിപോലുള്ള ഒരു മറുനാടന്‍ മലയാളിവേദിയില്‍ ചരിത്രത്തില്‍ ആദ്യമായാണ് ഒരു മുസ്ലിം വിദ്യാര്‍ഥിനി ജനറല്‍ സെക്രട്ടറിയായി തെരഞ്ഞെടുക്കപ്പെട്ടത്. പതിവ് കീഴ്വഴക്കങ്ങള്‍ സൃഷ്ടിച്ച പ്രതിസന്ധി യെക്കുറിച്ച് ഇടതുപക്ഷസ്വഭാവമുള്ള വിദ്യാര്‍ഥികള്‍ പ്രതികരിച്ചത് മുസ്ലിം വര്‍ഗ്ഗീയവാദത്തിന്റെ അജണ്ട എന്ന രീതിയിലായിരുന്നു. മാത്രമല്ല, ആ മുസ്ലിം വിദ്യാര്‍ഥിനിയുടെ യോഗ്യതയെക്കുറിച്ച മുഖ്യസംശയം “അവള്‍ ഏഴ് മണിക്ക് ശേഷം പുറത്തിറങ്ങുമോ?” എന്നതായിരുന്നു. മുസ്ലിം സമം വര്‍ഗ്ഗീയവാദി, മുസ്ലിം സ്ത്രീ സമം അടിച്ചമര്‍ത്തപ്പെട്ട ഇര തുടങ്ങിയ ഔദ്യോഗിക ഇടതുപക്ഷം മുസ്ലിംകളെക്കുറിച്ച് നിര്‍മ്മിച്ച വാര്‍പ്പുമാതൃകള്‍ ഇത്തരം സംവാദങ്ങളില്‍ ധാരാളമായി കാണാന്‍ കഴിയുന്നുണ്ട്. പറഞ്ഞുവരുന്നത് കാമ്പസുകളില്‍ പുതിയ തരത്തില്‍ ഇന്ത്യയുടെ സാമൂഹികഘടനയുമായി ബന്ധപ്പെട്ട് നടക്കുന്ന അന്വേഷണങ്ങളെ മുഖ്യധാര ഇടതുപക്ഷത്തിന്റെ പരികല്‍പനകള്‍ പ്രകാരം ആഗോളീകരണം അഭിമുഖീകരിക്കാന്‍ കഴിയാതെ വരികയും അതുകൊണ്ട് അരാഷ്ട്രീയവത്കരണം, മത-ജാതി വര്‍ഗ്ഗീയത തുടങ്ങിയ ഏകപക്ഷീയമായ ഫോര്‍മുലകളിലേക്ക് എളുപ്പം വഴുക്കിവീഴുകയും ചെയ്യുന്നു.

*******************************************

(കെ.ടി ഹാഫീസ്, സെയ്ഫുദ്ദീന്‍ കുഞ്ഞ് (ജാമീഅ മില്ലിയ ഇസ്ലാമിയ, ഡല്‍ഹി), ശഹീന്‍ കെ.ടി, മുഹ്സിന. ഉമ്മുല്‍ ഫായിസ (ഡല്‍ഹി യൂണിവേഴ്സിറ്റി), തുഫൈല്‍ കെ, അനുനാഥ് മുരളി, ആദില്‍ അലി പള്ളികാടന്‍, സിമി കെ. (ഹൈദരാബാദ് യൂണിവേഴ്സിറ്റി), ഉബൈദ് റഹ്മാന്‍, ആബിദ് ആബൂബക്കര്‍ (വിദ്യാര്‍ഥി ഭവനം, കോഴിക്കോട്) തുടങ്ങിയവരുമായി ഈ ലേഖനം പല രീതിയില്‍ കടപെട്ടിരിക്കുന്നു)

റഫറന്‍സ്:
അഷ്റഫ്, കെ. (എഡിറ്റര്‍), ക്ളാസ്മേറ്റ്സ്: കാമ്പസിന്റെ വര്‍ത്തമാനം അഥവ കാമ്പസിന്റെ ചരിത്രം, എസ്.ഐ.ഒ കേരള സോണ്‍, 2010.
Tharu, Susie and Satyanarayana, K. (Edited and Introduced), No Alphabet in Sight: New Dalit Writing from South India, Dossier I: Tamil and Malayalam, Penguin, 2011..
Tharu, Susie and Satyanarayana, K. (Edited and Introduced), No Alphabet in Sight: New Dalit Writing from South India, Dossier I: Tamil and Malayalam, Penguin, 2011.Omvedt,
Gail. “`Twice-Born’ Riot Against Democracy”, in Asghar Ali Engineer (Editor), Mandal Commission Controversy, Ajanta Publications, 1991.
Santhosh, S and K Abraham, Joshil. Caste Injustice in Jawaharlal Nehru University, Economic & Political Weekly, June 26, 2010
Balagopal, K. This anti-Mandal Mania. ‘Economic and Political Weekly, October 6, 1990.