ഞാന്‍ വായില്‍ എല്ല് സൂക്ഷിക്കുന്നില്ല

മാധ്യമ സ്വാതന്ത്ര്യം എന്ന ജനങ്ങളുടെ മൌലിക അവകാശം ഇല്ലാതാക്കാന്‍ ഫാസിസ്റ്റ് സ്വഭാവമുള്ള ഭരണകൂടങ്ങളും പാര്‍ട്ടികളും മത മൌലിക വാദികളും എക്കാലത്തും ശ്രമിച്ചിട്ടുണ്ട്. ഇന്ത്യയില്‍ അടിയന്തിരാവസ്ഥയുടെ ഇരുണ്ട നാളുകളിലാണ്‌ ഏറ്റവും രൂക്ഷമായ  മാധ്യമ സ്വാതന്ത്ര്യനിഷേധം അരങ്ങേറിയത്. ഭൂരിപക്ഷം പത്രങ്ങളും പത്ര പ്രവര്‍ത്തകരും കുനിയാന്‍ പറയുന്നതിന് മുന്‍പേ  ഇഴഞ്ഞുവെങ്കിലും അതിനു തയ്യാറാകാതിരുന്നവര്‍ ഭരണകൂട ഭീകരതയുടെ ഉരുക്കുമുഷ്ടികളാല്‍ പീഡിപ്പിക്കപ്പെട്ടു. എന്നാല്‍ അടിയന്തിരാവസ്ഥക്ക് ശേഷവും രാജ്യത്താകമാനവും  കേരളത്തിലും  മാധ്യമ പ്രവര്‍ത്തനം ഇപ്പോളും പല തരത്തില്‍ ഭീഷണി നേരിട്ട് കൊണ്ടിരിക്കുകയാണ്.  അടിയന്തിരാവസ്ഥയെ എതിര്‍ത്തുവെന്നു അവകാശപ്പെടുന്ന സംഘടനകളാണ് പലപ്പോഴും മാധ്യമ സ്വതന്ത്ര്യത്തെ നഗ്നമായി കയ്യേറ്റം ചെയ്യുന്നത്. അതിന്റെ  ഒടുവിലത്തെ ഉദാഹരണമാണ് ഏഷ്യാനെറ്റ് ന്യൂസിന്റെ കോഴിക്കോട് ബ്യൂറോ ചീഫായ ഷാജഹാന്‍ കാളിയത്തിനെതിരെ കഴിഞ്ഞ തെരഞ്ഞെടുപ്പു കാലത്ത് സിപിഎം നേതാവിന്റെ ഒത്താശയോടെ നടന്ന  കയ്യേറ്റവും  നിരന്തരം ആവര്‍ത്തിച്ചുകൊണ്ടിരിക്കുന്ന ഭീഷണികളും. നേരത്തെ മത  തീവ്രവാദി എന്ന്  മുദ്ര കുത്തിയായിരുന്നു ആക്രമണമെങ്കില്‍ ടിപി ചന്ദ്രശേഖരന്‍ വധം റിപ്പോര്‍ട്ട്‌  ചെയ്തതിന്റെ പേരില്‍ ആര്‍എംപിക്കാരന്‍ എന്ന ചാപ്പ കുത്തിയാണ് അദ്ദേഹത്തിനെതിരെ ഭീഷണികളും അപവാദ പ്രചാരണങ്ങളും നടക്കുന്നത്.  ഷാജഹാനെതിരായ നീക്കങ്ങള്‍ മാധ്യമ സ്വാതന്ത്ര്യതിനെതിരായ വെല്ലുവിളി തന്നെയാണ്. മാതൃഭൂമി പത്രം പ്രസിദ്ധീകരിച്ച ലേഖനം ഉത്തരകാലം പുന:പ്രസിദ്ധീകരിക്കുന്നത് അദ്ദേഹം പുലര്‍ത്തുന്ന ധീരതയോടുള്ള  സഹോദര്യ പ്രഖ്യാപനം എന്ന നിലയിലാണ്.  

ഷാജഹാന്‍ കാളിയത്ത്‌

‘ഡിവൈ.എസ്.പി. ഷൗക്കത്തലിയുടെ ചെരിപ്പുനക്കി സി.പി.എമ്മിനെതിരെ വാര്‍ത്ത പടച്ചുണ്ടാക്കുന്ന ഇത്തരം മാധ്യമപ്രവര്‍ത്തകരെ തിരിച്ചറിയുക. അറസ്റ്റുചെയ്ത സഖാവ് പി. മോഹനന്‍ യാത്രചെയ്യുന്ന വാഹനം പിന്തുടര്‍ന്ന് നടത്തിയ നാടകീയമായ അറസ്റ്റ് ലൈവ്‌സംപ്രേഷണം നടത്താന്‍ ഡിവൈ.എസ്.പി. ഈ ആര്‍.എം.പി. പ്രവര്‍ത്തകനായ ടി.വി. റിപ്പോര്‍ട്ടറെ ഏല്പിക്കുകയായിരുന്നു…’

കമന്റ്: ഇവനെയല്ലേ ജയരാജന്‍ സഖാവ് ചാമ്പിയത്. എന്നിട്ടും ഇവന്റെ കഴപ്പ് മാറാത്തത് കഷ്ടം. ലൈക്ക് 15′

കമന്റ്: ഇവനെയാണോ? നമ്മള്‍ അടുത്തതായി തട്ടുന്നത്? ലൈക്ക് 21.

ജൂണ്‍ 30ന് ഫേസ്ബുക്കില്‍ പ്രത്യക്ഷപ്പെട്ട ഒരു പോസ്റ്റും അതിനോടുള്ള രണ്ട് കമന്റുകളുമാണ് മുകളില്‍ ചേര്‍ത്തത്. ഇതുപോലെ നൂറ്റമ്പതോളം കമന്റുകളാണ് കാഴ്ച എന്ന പ്രൊഫൈലിന്റേതായി പോസ്റ്റ്‌ചെയ്യപ്പെട്ട കുറിപ്പിനോടുള്ള പ്രതികരണമായി വന്നത്. പലതും ഇവിടെ എഴുതാന്‍ കൊള്ളില്ല.
യാദൃച്ഛികമല്ല, ഈ പോസ്റ്ററും കമന്റും. ഇതില്‍ പരാമര്‍ശിക്കപ്പെട്ട റിപ്പോര്‍ട്ടര്‍ ഞാനാണ്. ഡിവൈ.എസ്.പി. തലശ്ശേരിയിലെ ഷൗക്കത്തലിയും. പി. മോഹനനെ അറസ്റ്റുചെയ്ത വാര്‍ത്ത പുറംലോകത്തെ അറിയിച്ചത് ഞാനാണ്. പക്ഷേ, ഈ കേസുമായി ബന്ധപ്പെട്ട് ഒരിക്കല്‍പ്പോലും ഷൗക്കത്തലിയെ ഞാന്‍ വിളിച്ചിട്ടില്ല. ഷൗക്കത്തലിയുമായി മുഖപരിചയംപോലും എനിക്കില്ല. പി.മോഹനന്റെ അറസ്റ്റ് ലൈവായി ഞാന്‍ ജോലിചെയ്യുന്ന ചാനല്‍ സംപ്രേഷണം ചെയ്തിട്ടില്ല. ഞാന്‍ ആര്‍.എം.പി. പ്രവര്‍ത്തകനല്ല. ’90’97 കാലഘട്ടത്തില്‍ എസ്.എഫ്.ഐ.യുടെ കാമ്പസിലെ നേതാവായിരുന്നു എന്നതില്‍പ്പരം ഒരു രാഷ്ട്രീയപ്രവര്‍ത്തനവും ഞാനൊരുകാലത്തും നടത്തിയിട്ടില്ല.
അതുകൊണ്ട് ഒരു പൊതുവിജ്ഞാനത്തിന്റെ കണക്കില്‍പ്പെടുത്തി എനിക്കെതിരെയുള്ള ആക്ഷേപങ്ങളെ കാണാനാകില്ല. യാദൃച്ഛികമല്ല, ടി.പി. വധക്കേസിനെ ആര്‍ജവത്തോടെ റിപ്പോര്‍ട്ട്‌ചെയ്ത ഒരു മാധ്യമപ്രവര്‍ത്തകന്‍ എന്ന നിലയ്ക്ക് എനിക്കെതിരെയുണ്ടായ ആക്രമണങ്ങള്‍.

ടി.പി. വധം മെയ് നാലിന് രാത്രി 10.40ഓടെ എന്നെ വിളിച്ചറിയിക്കുന്നത് എന്റെ നാട്ടുകാരനാണ്. ടി.പി.വധം നടന്ന വള്ളിക്കാടിന് 750 മീറ്റര്‍മാത്രം അകലെയാണ് കൈനാട്ടിയിലെ എന്റെ വീട് എന്നതിനാല്‍ ഈ പ്രദേശത്ത് ഉണ്ടാകുന്ന ചെറിയ സംഭവവികാസങ്ങള്‍പോലും സാധാരണഗതിയില്‍ ഞാനറിയാറുണ്ട്. വാര്‍ത്ത ആദ്യം വിളിച്ചുപറഞ്ഞയാള്‍ ‘ഒരാളെ കൊന്ന് റോഡരികിലിട്ടിട്ടുണ്ട്’ എന്നാണ് പറഞ്ഞത്. ആ പ്രദേശത്തുള്ള ചിലരെ വിളിച്ചപ്പോള്‍ എന്തോ നടന്നിട്ടുണ്ട് എന്നുമാത്രമാണ് പറഞ്ഞത്. പിന്നാലെയാണ് ആ പ്രദേശത്തിനടുത്ത് താമസിക്കുന്ന എന്റെ ഒരു സഹപ്രവര്‍ത്തകനും പ്രാദേശികലേഖകനും അത് ടി.പി.യാണെന്ന് പറയപ്പെടുന്നല്ലോ എന്ന് അറിയിച്ചത്.

ടി.പി. എന്ന മനുഷ്യന്‍ മരിക്കരുത് എന്ന ആഗ്രഹം കൊണ്ടും ഇത്തരമൊരു വ്യാജവാര്‍ത്ത പ്രചരിക്കുന്നുണ്ടല്ലോ എന്നുചോദിക്കാനായി ടി.പി.യുടെ ഫോണില്‍ത്തന്നെയാണ് ഞാന്‍ വിളിച്ചത്. രണ്ടുഫോണുകളും റിങ്‌ചെയ്തിരുന്നു. ഫോണെടുത്തില്ല. പിന്നാലെ ടി.പി. തന്നെയെന്ന് സംശയം ബലപ്പെടുത്തി പലരും വിളിച്ചു. ടി.പി.യുടെ സഹചാരിയായ കെ.കെ. ജയനെ ആസ്​പത്രിയില്‍ വിളിച്ച് മരിച്ചത് ടി.പി.തന്നെ എന്ന് ഉറപ്പുവരുത്തി, ഞാന്‍ ലോകത്തോട് വിളിച്ചുപറഞ്ഞു, ‘ഒഞ്ചിയത്തെ വിമതനേതാവിനെ വെട്ടിക്കൊന്നു’.

ടി.പി.വധം മലയാളിയെ ആദ്യമറിയിച്ചത് ഞാനായിരുന്നു. ഒരു മാധ്യമപ്രവര്‍ത്തകന്‍ എന്നനിലയില്‍ അതിന്റെ ദൃശ്യങ്ങള്‍ പരമാവധിവേഗത്തില്‍ പ്രാദേശികലേഖകരെ അയച്ച് ഞാന്‍ സ്റ്റുഡിയോയില്‍ എത്തിച്ചു.

പിന്നീട് 24 മണിക്കൂറോളം ക്യാമറയ്ക്കുമുന്നിന്‍നിന്ന ഞാന്‍ ഒഞ്ചിയത്തെ പാര്‍ട്ടിപിളര്‍പ്പും ചരിത്രവും അപ്പപ്പോള്‍ പോലീസിന് കിട്ടിക്കൊണ്ടിരുന്ന സൂചനകളും നല്‍കിയിരുന്നു. പോലീസ് മാത്രമല്ല, സി.പി.എമ്മിനകത്തെ പല സുഹൃത്തുക്കളും നിര്‍ണായകമായ വിവരങ്ങള്‍ നല്‍കിയിരുന്നു.

ആ ദിവസം കഴിഞ്ഞ് പി.ജയരാജന്‍ കണ്ണൂരില്‍ പ്രസ്താവിച്ചു”ടി.പി.വധത്തില്‍ ഒരു മാധ്യമപ്രവര്‍ത്തകന് പങ്കുണ്ട്. സംഭവംനടന്ന് മിനിറ്റുകള്‍ക്കകം അവര്‍ വാര്‍ത്ത നല്‍കിയതും ദൃശ്യങ്ങള്‍ കാണിച്ചതും അതിനുള്ള തെളിവാണ്.”

ഇതുകൊണ്ട് അവസാനിച്ചില്ല. കവലപ്രസംഗത്തിലും വാര്‍ത്താസമ്മേളനത്തിലും ഞാന്‍ വ്യാജവാര്‍ത്തകള്‍ ചമയ്ക്കുന്നെന്ന് നേതാക്കള്‍ പറഞ്ഞു. ദേശാഭിമാനി ആദ്യം എന്നെ ആര്‍.എം.പി.യും പിന്നെ മതതീവ്രവാദിയുമാക്കി. എന്റെ ‘തീവ്രവാദ’ബന്ധത്തെക്കുറിച്ച് പലകോളം വാര്‍ത്തകള്‍ ആഘോഷിച്ചു.

ഏഷ്യാനെറ്റ്‌ന്യൂസിന്റെ ചാനല്‍ചര്‍ച്ചയിലെത്തിയ എളമരം കരീം ഭീഷണിമുഴക്കി”വ്യാജവാര്‍ത്തയാണ് റിപ്പോര്‍ട്ട്‌ചെയ്യുന്നത്. ആര്‍.എം.പി.ക്കാരന്‍. അയാളുടെ തിരക്കഥ പോലീസ് നടപ്പാക്കുന്നു”.

പി.മോഹനന്റെ അറസ്റ്റ് റിപ്പോര്‍ട്ടുചെയ്തപ്പോള്‍ ഞാന്‍ വാര്‍ത്ത നല്‍കിക്കൊണ്ടിരിക്കേ ലൈവില്‍ പ്രതികരണത്തിനെത്തിയ എളമരം ‘വ്യാജവാര്‍ത്ത മുതല്‍ ആര്‍.എം.പി. പ്രവര്‍ത്തകന്‍’ വരെയുള്ള ആരോപണവും ഭീഷണിയും ആവര്‍ത്തിച്ചു.

കിട്ടിയ അവസരത്തില്‍ ഞാന്‍ തിരികെച്ചോദിച്ചു, ‘ശ്രീമാന്‍ കരീം, ആദ്യം വാര്‍ത്ത കൊടുക്കാന്‍ ഗൂഢാലോചനയില്‍ പങ്കാളിയാകണോ? അതിന് മിടുക്ക് പോരേ. ആര്‍.എം.പി.യുമായി ബന്ധപ്പെട്ട വാര്‍ത്ത റിപ്പോര്‍ട്ട്‌ചെയ്യാന്‍ ആര്‍.എം.പി.ക്കാരനാകണോ? സി.പി.എം. വിരോധവും വ്യക്തിവിരോധവുമാണ് വാര്‍ത്തയ്ക്ക് ആധാരമെങ്കില്‍ എനിക്ക്, എന്നെ നിരന്തരം ആക്രമിക്കുന്ന താങ്കളും സംശയിക്കപ്പെടുന്നവരുടെ പട്ടികയിലുണ്ടെന്ന് പറഞ്ഞാല്‍ പോരേ?’

ഏത് വാര്‍ത്തയാണ് വ്യാജം? നേതാക്കളുടെ അറസ്റ്റോ? സംശയിക്കപ്പെടുന്നവരെന്ന് ഞാനടക്കമുള്ള മാധ്യമപ്രവര്‍ത്തകര്‍ പറഞ്ഞവരെയൊക്കെ അറസ്റ്റുചെയ്തില്ലേ?

മെയ് നാലിനുശേഷം ഏഷ്യാനെറ്റ്‌ന്യൂസ് സംഘം റിപ്പോര്‍ട്ട്‌ചെയ്യാന്‍പോയ നൂറ് കേന്ദ്രങ്ങളിലെങ്കിലും ‘ആര്‍.എം.പി.ക്കാരന്‍ ഷാജഹാനെ’ കൈകാര്യംചെയ്യാന്‍ കൂറുള്ള സഖാക്കള്‍ എത്തിയിരുന്നു. ഫേസ്ബുക്കിലും ഫോണിലൂടെയും പരിചയമുള്ളവരും അല്ലാത്തവരും ഉപദേശമെന്ന വ്യാജേന ഭീഷണികള്‍ മുഴക്കിയിരുന്നു. ഒറ്റയ്ക്ക് പുറത്തിറങ്ങരുതെന്ന് സ്‌പെഷല്‍ബ്രാഞ്ചിന്റെ മുന്നറിയിപ്പ് കിട്ടിയിരുന്നു. മുന്നറിയിപ്പ് ഇപ്പോഴും നിലനില്‍ക്കുന്നു.

‘ഞാന്‍ ഏതെങ്കിലും കുറ്റകൃത്യത്തില്‍ പങ്കാളിയാണോ? മാധ്യമപ്രവര്‍ത്തനം ഒരു ഭീകരപ്രവര്‍ത്തനമാണോ? ഭീഷണിപ്പെടുത്തിയും എന്നെ നേരിടാന്‍ ആഹ്വാനംനല്‍കിയും എന്തൊക്കെ സാധിക്കാം?

വായില്‍ എല്ല് സൂക്ഷിക്കുന്ന പട്ടിക്ക് കുരയ്ക്കാനാകില്ല. അടിയന്തരാവസ്ഥ ഭൂതകാലമല്ല. ഇച്ഛിക്കാത്തത് പറയുന്നത് വിരട്ടാനും സെന്‍സര്‍ ചെയ്യാനും നിശ്ശബ്ദനാക്കാനും പിന്നെ വകവരുത്താനുമുള്ള ആയുധം.

ആ ആയുധം കൈയിലിരിക്കട്ടെ, നിങ്ങളുടെ വായിലെ എല്ലും അവിടെയിരിക്കട്ടെ. തെരുവിലൊരാള്‍ വെട്ടിമുറിക്കപ്പെട്ടു എന്ന് പറയാനുള്ള സ്വാതന്ത്ര്യം വേണം. ചോരചിന്തിയത് കാണുമ്പോഴെങ്കിലും ഉദാരമായ നിഷ്പക്ഷത നടിക്കാതിരിക്കാനാകണം. ഇരയാരെന്നും വേട്ടക്കാരനാരെന്നും തിരിച്ചറിയാനുള്ള ഔചിത്യം വേണം. പ്രതിക്കുവേണ്ടി മിടിക്കാത്ത ചങ്ക് വേണം. ഭയപ്പെടുത്തുന്നവന്റെ മുഖത്തുനോക്കി നട്ടെല്ല് നിവര്‍ത്തിപ്പിടിച്ച് ‘നിനക്കുവേണ്ടിയല്ല എന്റെ ഹൃദയം മിടിക്കുന്നതെന്ന് പറയാന്‍ എനിക്ക് മടിയില്ല.

(‘ഏഷ്യാനെറ്റ് ന്യൂസി’ന്റെ കോഴിക്കോട് ബ്യൂറോ ചീഫാണ് ലേഖകന്‍)

കടപ്പാട്: മാതൃഭൂമി