ഫ്രാന്‍സ് ഫാനനോടൊപ്പം :അന്നും ഇന്നും :

 നെല്‍സണ്‍ മല്‍ഡൊണാഡോ ടോറസ് (Nelson Maldonado-Torres )

ഫ്രാന്‍സ് ഫാനന്‍ മരിച്ചിട്ട് കഴിഞ്ഞ ഡിസംബര്‍  ആറിന് അമ്പതു വര്‍ഷം തികഞ്ഞു. ഫാനന്‍റെ വര്‍ത്തമാനകാല പ്രസക്തി വളരെ ഹ്രസ്വമായ ഒരു കുറിപ്പിലൂടെ വിവരിക്കുകയാണു നെല്‍സണ്‍ മല്‍ഡൊണാഡോ ടോറസ്.

അമ്പതു വര്‍ഷം മുന്‍പ് മര്‍തിനികന്‍ അള്‍ജീരിയന്‍ ചിന്തകനായിരുന്ന ഫ്രാന്‍സ് ഫാനന്‍ ഇങ്ങനെ എഴുതി.’ പൊട്ടിത്തെറി ഇന്നൊന്നും സംഭവിക്കില്ല. അതു വളരെ പെട്ടന്നുണ്ടാകും… അല്ലെങ്കില്‍ വളരെ വൈകും ‘ (1979 :7). ഫാനന്‍ ഈ വാക്കുകള്‍ എഴുതിയതത് രണ്ടാം ലോക യുദ്ധത്തില്‍ പങ്കെടുത്തതിനു ശേഷവും അള്‍ജീരിയയില്‍ എത്തി ദേശീയ വിമോചന മുന്നണിയില്‍ (എന്‍ ‍.എല്‍ ‍.എഫ്) ചേരുന്നതിനും ഇടക്കുള്ള കാലത്താണ്.രണ്ടാം ലോക യുദ്ധത്തിലെയും അള്‍ജീരിയന്‍ വിമോചന മുന്നണിയിലെയും ഫാനന്‍റെ പങ്കാളിത്തം എന്നത് വംശീയ വാദത്തിനെതിരെയും കൊളോണിയലിസത്തിനെതിരെയും ചില മനുഷ്യരെയും കര്‍തൃത്വങ്ങളെയും മറ്റു ചിലര്‍ അപമാനവീകരിക്കുന്നതിനെതിരെയും ആയിരുന്നു. അക്കാലത്ത് പൊട്ടിത്തെറി എവിടെയും ദൃശ്യമായിരുന്നു. എല്ലാ പൊട്ടിത്തെറികള്‍ക്കു ശേഷവും തുടര്‍ന്നുകൊണ്ടേയിരിക്കുന്ന പ്രശ്നങ്ങളും അടിച്ചമര്‍ത്തലുകളും തന്നെയാണ് ഫാനനെ മേല്‍പ്പറഞ്ഞ വരികളെഴുതിച്ചത്.എന്നാല്‍ ഫാനന്‍ പറയുന്നത് രണ്ടാം -ലോക യുദ്ധം ജയിച്ചു എന്നതുകൊണ്ട് വംശീയതയും കൊളോണിയലിസവും അവസാനിച്ചിട്ടില്ല എന്നാണ്. എല്ലാത്തിനും അന്ത്യം കുറിക്കുന്ന ‘പൊട്ടിത്തെറി’ വരാനിരിക്കുന്നേയുള്ളൂ.അല്ലെങ്കില്‍ അത് ഒരു അനിശ്ചിതത്വത്തിലാണ് .

ഫാനന്‍ മരണശേഷം അമ്പതുവര്‍ഷം പിന്നിടുമ്പോള്‍ ഫാനന്‍ അഭിമുഖീകരിച്ച അതേ ചരിത്രപരവും അസ്തിത്വപരവുമായ അവസ്ഥകളില്‍ തന്നെയാണു നമ്മളും ഇന്നുള്ളത്.പഴയ കോളനി ബന്ധങ്ങള്‍ ഇപ്പോള്‍ പഴയ രീതിയലല്ല ഉള്ളതെങ്കിലും നമ്മള്‍ തിരിച്ചറിയേണ്ട പ്രധാനകാര്യമെന്നത് ഇന്നത്തെ ആഗോള അധികാരവ്യവസ്ഥയും അതിന്‍റെ പ്രതിനിധാനങ്ങളും രൂപപ്പെടുന്നത് ആധുനിക/കോളനിബന്ധങ്ങളിലൂടെയും (മല്‍ഡൊണാഡോ ടോറസ് ഇതുപയോഗിക്കുന്നത് ആധുനിക ആധുനികാനന്തര എന്ന വിശകലന രീതിക്കു പുറത്തുകടക്കാനാണ് .വിവ: ) അതിലൂടെ രൂപപ്പെട്ട വംശീയത ,അടിമത്തം,വംശഹത്യഎന്നിവയിലൂടെയുമാണ്.ഫാനനെ അടിവരയിട്ടുകൊണ്ട് പെറുവില്‍ നിന്നുള്ള സാമൂഹിക ശാസ്ത്രജ്ഞനായ അനിബാല്‍ കുയാനോ ഇന്നത്തെ അവസ്ഥയെ വിളിക്കുന്നത്‌ ‘അധികാരത്തിന്‍റെ കോളനിപരത’ എന്നും ജമൈക്കന്‍ ചിന്തകനായ സില്‍വിയ വിന്‍റര്‍ ‘ആധുനികതയുടെ നാഗരിക വ്യവഹാരം’ എന്നുമാണ്..
കോളനിവല്കരണത്തിന്‍റെ പഴയ ഔപചാരിക ബന്ധങ്ങളോടു മാത്രമല്ല, കൊളോണിനിയലിസത്തോടും വംശീയതയോടും ദേശരാഷ്ട്രങ്ങളുടെ അപമാനവീകരണ പ്രവണതകളോടും പുതിയ സമീപനങ്ങള്‍ രൂപപ്പെടുത്തുന്നതിലൂടെയാണ് ഇന്നത്തെ പോരാട്ടം നിര്‍ണയിക്കപ്പെടുന്നത്. ഇന്നത്തെ ആഗോള അധികാര വ്യവസ്ഥ എന്നത് കേവലം മുതലാളിത്ത വിരുദ്ധ ഏര്‍പ്പാടൊന്നുമല്ല എന്നും നാം തിരിച്ചരിയേണ്ടതുണ്ട്. . ‘ഭൂമിയിലെ നിന്ദിതര്‍ ‍’ എന്ന തന്‍റെ പുസ്തകത്തില്‍ കൊളോണിയലിസത്തെയും വംശീയതയെയും കേവല വര്‍ഗ പ്രശന്മാക്കി ചുരുക്കുന്നതിനെ ഫനോന്‍ വിമര്‍ശിക്കുന്നുണ്ട്. ‘കോളനികളിലെ സാമ്പത്തിക ഘടന എന്നത് ഒരു ഉപരി ഘടന ആണ്.നിങ്ങള്‍ വെളുത്തനാവുന്നതു കൊണ്ടാണു സമ്പന്നനാവുന്നത്, നിങ്ങള്‍ സമ്പന്നനാവുന്നതു വെളുത്തവനാവുന്നതു കൊണ്ടാണ്.ഇതുകൊണ്ടാണു കൊളോണിയലിസത്തെ അഭിമുഖീകരിക്കുമ്പോള്‍ മാര്‍ക്സിസത്തെ നമുക്ക് ഏറെ വലിച്ചുനീട്ടേണ്ടിവരുന്നത് (1977 :34 ).അമ്പതു വര്‍ഷത്തിനു ശേഷവും ഫാനന്‍റെ ഈ നിരീക്ഷണത്തില്‍ നിന്ന് ഏറെ പഠിക്കാനുണ്ട്,വിശിഷ്യ ഇടതുപക്ഷത്തുള്ളവര്‍.

കോളനികളില്‍ ‍ ഫാനന്‍ കാണുകയും ചികിത്സിക്കുകയും ചെയ്ത പ്രശ്നങ്ങള്‍ അവിടെ മാത്രം ഒതുങ്ങുന്നതല്ല. അധികാരത്തിന്‍റെയും സ്വതത്തിന്റെയും  ലിംഗബന്ധത്തിന്‍റെയും കോളനിപരത എന്നത് അടിമക്കപ്പലുകളിലും പ്ലാന്‍റേഷനുകളിലും വീടകങ്ങളിലും സ്റ്റേറ്റിലും എമ്പയറും കോളനിയും തമ്മിലുള്ള ബന്ധത്തിലും കേന്ദ്രവും അതിന്‍റെ പുറമ്പോക്കും തമ്മിലുള്ള ബന്ധത്തിലും ഒക്കെ രൂപപ്പെടുന്നുണ്ട്.അതുകൊണ്ടുതന്നെ നാനാവിധത്തില്‍ , നാനാവഴികളില്‍ ഇതു വികസിക്കുകയും നമ്മെ എല്ലാവരെയും ബാധിക്കുകയും ചെയ്യുന്നു. കോളനിപരത അങ്ങേയറ്റത്തെ മര്‍ദക സ്വഭാവമാണു വംശീയ സ്വത്വങ്ങളോടും പഴയതും പുതിയതുമായ കോളനികളില്‍ നിന്നുള്ളവരോടും സ്വീകരിക്കുന്നത്.അതുകൊണ്ടാണ്,ഈ അമ്പതു വര്‍ഷങ്ങള്‍ക്കു ശേഷവും ഫനോന്‍റെ ചിന്തകള്‍ അങ്ങേയറ്റം പ്രസക്തമാവുന്നത്.

ഫനോന്‍ കണ്ട യൂരോപ്പെന്നത്  അങ്ങേയറ്റത്തെ കോളനിപരത ഉള്ളതായിരുന്നു.അതാണ്‌ ഹിറ്റ്ലറുടെ വംശീയതയിലും സാമ്രാജ്യത്വ കടന്നുകയറ്റങ്ങളിലും ആഹ്ലാദം കണ്ടെത്തിയത്. ഇന്നും യുറോപ്പിന്‍റെ കൊളോണിയല്‍ എന്ന വംശീയാടിസ്ഥാനത്തിലൂടെയാണു കോളനിപരത കടന്നുവരുന്നത്. ഈ കൊളോണിയല്‍ വംശീയാടിസ്ഥാനത്തിരുന്നുകൊണ്ടാണ് യൂറോപ്പ് എന്നും പതിവുപോലെ സ്വന്തം കുഴപ്പങ്ങള്‍ മറച്ചു വെക്കുന്നതും മറ്റുള്ളവരെ പീഡിപ്പിക്കുന്നതും .മാത്രമല്ല പ്രതിഷേധിക്കുന്ന,മാറ്റങ്ങള്‍ ആഗ്രഹിക്കുന്ന സമുദായങ്ങളെയും പ്രസ്ഥാനങ്ങളെയും സാത്താനികവല്‍ക്കരിക്കുകയും ചെയുന്നു. അമേരിക്കയിലും ഇതുതന്നെയാണു നടക്കുന്നത്.സ്പാനിഷ്‌ സംസാരിക്കുന്ന കുടിയേറ്റക്കാരെയും മറ്റു നിരക്കാരായ സമുദായങ്ങളെയും അവര്‍ ആക്രമിക്കൂന്നു. ഇതേ കോളനിമനോഭാവം തന്നെയാന്നു യുറോപ്പിനും അമേരിക്കക്കും പുറത്തുള്ള ആഗോള തെക്കന്‍ ഭാഗത്തുള്ളവ വരെന്ന്യരും പുലര്‍ത്തുന്നത്.

ഇന്ന് മറ്റെന്തിനെകാലും ഫാനന്‍ കോളനികളില്‍ മാത്രമല്ല എമ്പയറിന്‍റെ നഗരങ്ങളിലും
പ്രസക്തമാണ് .എമ്പയറിന്‍റെ ഈനഗരങ്ങളിലാണു വംശീയതയില്ല പൌരന്മാര്‍ മാത്രമാണ് ഉള്ളത് എന്നു പറയുന്നത്.അതായതു ‘പൌരത്വം’ എന്നൊക്കെ പറയുന്നതിലൂടെ ഒരു പ്രത്യേക തരത്തിലുള്ള മനുഷ്യരെ മാത്രം കാണുകയും ചില പ്രത്യേക വംശീയ വിഭാഗങ്ങളുടെയും സമുദായങ്ങളുടെയും അടിസ്ഥാനപരമായ ഘടകങ്ങളെ കണ്ടില്ലെന്നു നടിച്ചും അംഗീകരിക്കാതെയും അവയെ പൌരത്വത്തിന്‍റെ മാനദണ്ഡങ്ങളില്‍ നിന്നു പുറത്താക്കുകയും ചെയ്യുന്നു. ഇവിടെയാണ്‌ വംശീയതയെ കയ്യൊഴിയാനും അപമാനവീകരിക്കപ്പെട്ട കര്‍തൃത്വങ്ങളുടെ
അഫര്‍മേശന്‍ സാധ്യമാകണമെന്നു പറയുമ്പോള്‍ അതിനെ സത്താവാദമെന്നു പറഞ്ഞു വിലക്കുന്നത്.

ഇക്കാലത്തും കോളനിവത്കരണം നടത്തിയവര്‍ ജീവിക്കുന്നിടത്തും അല്ലാത്തിടങ്ങളിലും വലതുപക്ഷം ഇടതുപക്ഷവുമായി കൈകോര്‍ക്കുകയും അങ്ങനെ വംശീയത എന്ന പ്രശ്നം ഉന്നയിക്കുന്നവരെ നിശ്ശബ്ദമാക്കുകയും നിരസിക്കുകയും ചെയ്യുന്നു.ആധുനിക വിശകലന മാനദണ്ഡങ്ങള്‍ക്കു മനസ്സിലാക്കാന്‍ കഴിയാത്ത സാമൂഹിക വിഭാഗങ്ങളെ അസാധുവാക്കുകയും ചെയ്യുന്നു.ഇങ്ങനെ യാഥസ്ഥിതികരും ലിബറലുകളും മാര്‍ക്സിസ്റ്റുകളും എന്തായിരിക്കണം സാമൂഹികവും രാഷ്ട്രീയപരവുമായ ഇടപെടലെന്ന പ്രശ്നത്തിനുമേല്‍ സ്വേഛാധിപതികളെപ്പോലെ വാഴുന്നു. അതുകൊണ്ടാണ് ഇത്തരം തിരിച്ചടികളുടെ കാലഘട്ടത്തിലും സന്ദര്‍ഭത്തിലും അടിച്ചമര്‍ത്തപ്പെട്ട വംശീയ വിഭാഗങ്ങള്‍ ഫാനനില്‍ അഭയം തേടുന്നത്.ഒരിക്കലും ഫാനന്‍ ജനങ്ങളുടെ മേല്‍ തന്‍റെ വിശകലനോപാധികള്‍ ഉന്നയിച്ചില്ല.കാരണം ഫനോന്‍ അത്രമേല്‍ കൊളോനിയലിസവും വംശീയതയും ജീവിതത്തിലൂടെ പരിചയപ്പെട്ടിട്ടുണ്ടായിരുന്നു.

ഫാനന്‍റെ ചിന്തകളെ പ്രയോഗവല്‍ക്കരിക്കുക എന്നത് വെറുതെ വളരെ ലളിതമായി ആവാകുകലും പ്രവര്‍ത്തനങ്ങളും ആഘോഷിക്കലല്ല .നമ്മള്‍ അധിവസിക്കുന്ന ലോകത്തിന്‍റെ അപകോളനീകരണ, അപവംശീയവല്‍ക്കരണ ശ്രമങ്ങളില്‍ ഏര്‍പ്പെടലാണ്. അത്ഇന്നത്തെലോകത്തിലെ ‘നിക്ര്ഷ്ടരും നിന്ധിതരുമയവരോടുള്ള ‘ കടപ്പാടാണ്. അത്സംഭവിക്കാന്‍ സാധ്യതയുള്ളതോ ചിലപ്പോള്‍ ഒരിക്കലും സംഭവിക്കുക പോലുമില്ലാത്ത ഒരു ‘പൊട്ടിത്തെറിയോടുള്ള’ പ്രതിബദ്ധതയാണ്. സ്വന്തം സാംസ്‌കാരിക സ്വതത്തെ വിലപ്പെട്ടതാണെന്നു കരുതന്നവരോടുള്ള പ്രതിബദ്ധതയാണ്.ഭൂമിയിലെ ‘നിന്ദതര്‍ക്കും’ അവരുടെ ലക്ഷ്യങ്ങളുണ്ട്‌.വ്യത്യസ്ത സമുദായങ്ങള്‍ക്കും നിന്ദിതര്‍ക്കുമിടയിലെ തന്ത്രപരമായ ബന്ധങ്ങള്‍ ഉണ്ടാക്കുന്നതിനും സ്വയംവിമര്‍ശനങ്ങള്‍ രൂപപ്പെടുത്തുന്നതിനും ഫാനനിന്‍റെ ചിന്തകള്‍ സഹായകമാണ്. ഇതു കരീബിയ മുതല്‍ ഫ്രാന്സ് വരെയും ഫ്രാന്‍സില്‍ നിന്ന് അള്‍ജീരിയ വരെയും അള്‍ജീരിയയില്‍ നിന്ന് ആഫ്രിക്ക മുഴുവനും അവിടെനിന്ന് അമേരിക്കകയിലേക്കും ലാറ്റിന്‍ അമേരിക്കകയിലേക്കും തുടര്‍ന്ന് ഏഷ്യയിലേക്കും അതിലപ്പുറത്തേക്കും ചെന്നെത്തുന്ന ബന്ധങ്ങല്ലും രൂപാന്തരങ്ങളും ആണ് ഫനോന്‍ നമ്മോടു പറയുന്ന അപകോളനീകരണം .

ഫാനന്‍ എഴുതി. :”ഞാനൊരിക്കലും എന്‍റെ കാലത്തില്‍ ചുരുങ്ങുന്നില്ല“.ഫാനന്‍ ജീവിച്ച കാലവും നമ്മുടെ കാലവും തമ്മിലുള്ള എല്ലാ വ്യത്യാസത്തെയും ഉള്‍ക്കൊണ്ടു തന്നെ നമ്മള്‍ അംഗീകരിക്കേണ്ട ഒരു കാര്യമെന്നത് ഫാനന്‍റെ ചിന്തകള്‍ ജീവിക്കുന്ന ഒരുകാലത്താണു നാമുള്ളത്‌ എന്നാണു്..അപകോളനീകരണം എന്നത് ഒരിക്കലും പൂര്‍ത്തിയാകാത്ത ഒരു പദ്ധതിയാണ്.

പരിഭാഷ: കെ. അഷറഫ് 

Bibliography:
Frantz Fanon (1973) Black Skin, White Masks
Frantz Fanon (1977) The Wretched of the Earth

(നെല്‍സണ്‍ മല്‍ഡൊണാഡോ:
Against War: Views from the Underside of Modernity. Durham: Duke University Press, 2008. എന്നപുസ്തകത്തിന്‍റെരചയിതാവാണ്. ഈ പുസ്തകം ഫ്രാന്‍സ്ഫനന്‍ ,ഇമാനുവല്‍ ലെവിനാസ് ,യെന്‍ റിക്ക്ദുസേല്‍ തുടങ്ങിയവരെ മുന്‍നിറുത്തി ആധുന്കതയുടെ യജമാനധര്മികതയെയും യുദ്ധ വാച്ച്ഞ്ഞ്ഹയെയും വിമര്‍ശിക്കുകയും അപകൊലനീകരനത്തിലൂന്നിയുള്ള പുതിയ നയ്തിക രാഷ്ട്രീയഭാവനകള്‍ പങ്കുവയ്ക്കുകയും ചെയ്യുന്നു.അടുത്ത പുസ്തകമായ Fanonian Mediation  പുറത്തിറക്കാനുള്ള തയ്യാറെടുപ്പിലാണ് നെല്‍സണ്‍ മല്‍ഡൊണാഡോ:–ടോറസ്)